Saýda jáne integratsiia ministrligi qanttyń tapshylyǵy týraly túrli aqparatqa túsinikteme berdi, dep habarlaidy Sputnik Qazaqstan.
Vedomstvo sońǵy birneshe kúnde áleýmettik jelilerde keibir azyq-túlik taýarlarynyń, sonyń ishinde qanttyń tapshylyǵy týraly túrli aqparat taraǵanyn atap ótti.
"Dúrbeleń suranystyń artýyna jáne bazarda alypsatarlyq faktisiniń týyndaýyna alyp keldi. Saýda jáne integratsiia ministrligi men aýyl sharýashylyǵy ministrligi ajiotajǵa erik bermeýge shaqyrady. Azyq-túlik ónimderin óndirý toqtatylmaidy, qorlar júieli negizde tolyqtyrylady", - delingen habarlamada.
AShM deregi boiynsha jarma, un, konserviler jáne basqa da taýarlar óndirisi úshin jetkilikti shikizat, sondai-aq et jáne sút ónimderin óndirý úshin jetkilikti mal basy bar.
Jedel derekter boiynsha respýblika boiynsha barlyǵy 1,5 million tonna áleýmettik mańyzy bar azyq-túlik taýarlarynyń qory jasalǵan. Onyń ishinde un – 145,1 myń tonna, qant – 47,6 myń tonna, kúrish – 40,2 myń tonna, makaron – 21,3 myń tonna jáne 1 million tonna kókónis ónimderi jáne t.b.
Saýda ministrligi búgingi kúni elde qant tapshylyǵy joq ekenin, qant óndirisi jalǵasyp jatqanyn málimdedi.
"Sondai-aq qazirgi ýaqytta Qostanai, Qaraǵandy, Aqmola, Pavlodar, Soltústik Qazaqstan oblystarynda básekelestikke qarsy kelisilgen áreketpen ÁMAT baǵasyn kóterý faktisi boiynsha jáne Mańǵystaý, Almaty oblystarynda tyńaitqysh óndirýge qatysty anyqtaý jumysy jalǵasyp jatyr", - deidi mamandar.
Básekelestikti qorǵaý jáne damytý agenttiginiń habarlaýynsha, Aqmola oblysynda nan óndirýshige jáne Jambyl oblysynda qant zaýytyna qatysty 2 tergeý aiaqtaldy.
Buǵan deiin jasalǵan 8 habarlamaǵa sáikes ónim baǵasy (Qostanai oblysynda – 5 jáne SQO – 3) tómendetildi. Básekelestikti qorǵaý salasyndaǵy zańnamany buzýǵa jol bermeý jónindegi monopoliiaǵa qarsy komplaenstiń 7 aktisi jasaldy. ÁMAT saýda ústemesi 15-ten 10%-ǵa deiin tómendetildi.
