Qazaqstannyń Saýda jáne integratsiia ministrligi eldegi qant qory týraly tilshilerge suhbat berdi, dep habarlaidy QazAqparat.
«Búginde bizdegi qant qory jetkilikti. Shamamen 67 myń tonna qant bar. Bul qorlar turǵyndarymyzdyń qajettilikterine tolyq jetkilikti. Oǵan qosa, kúndelikti qant jetkizýmen ainalysyp jatyrmyz», - dedi Saýda komitetiniń tóraǵasy Erjan Qazanbaev.
Onyń aitýynsha, EEK aiasynda qosymsha 100 myń tonna shiki qantqa kvota alynǵan. Bul kólem úsh qant zaýytyn tolyǵymen qamtamasyz etedi, olar kún saiyn halyqqa qajetti kólemde qant jetkizbek.
Sonymen birge, spiker dúken sórelerinde qanttyń taýsylýy týraly aqparatqa pikir bildirdi.
«Kei óńirlerde qant satyp alýdaǵy dúrlikpe týraly videolar bar. Negizi mundai dúrlikpe bolmaýy kerek. Qant turaqty túrde jetkizilip jatyr. Bálkim keibir saýda jelileri men nysandarda jetkizý azdap keshigýi múmkin, biraq bul júktiń jetkizilýine bailanysty. Qant bizge kún saiyn vagondarmen keledi jáne keibir saýda nysandaryna kesh túsedi. Qazirgi ýaqytta iri jáne orta saýda oryndarynda qant jetkilikti mólsherde bar jáne satylyp jatyr», - dedi ol.
Qazanbaev elimizde qant tapshylyǵy joq ekenin jetkizdi.
«Keibir saýda jelilerine qant sál kesh túsip, belgili bir aralyqta qant bolmaýy múmkin. Qant tapshylyǵy joq jáne ol bolmaidy da», - dep túsindirdi komitet tóraǵasy.
Kvota sheńberinde alynǵan qant shikizaty Qazaqstanǵa jetkizilip jatyr.
«Bizdegi qant zaýyttary shiki qantty aq qantqa ainaldyrý úshin tolyq qýatta jumys istep jatyr jáne qant kún saiyn óńirlerge, saýda oryndaryna jetkiziledi. Qant tapshylyǵy joq ekenin taǵy da qaitalap aitqym keledi. Kei saýda núktesi nemese úi janyndaǵy dúken qantty ýaqtyly almaǵannan azdaǵan irkilister bolýy múmkin», - dep naqtylady Erjan Qazanbaev.
