Foto: ashyq derekkóz
Sońǵy kúnderi áleýmettik jelilerde qant diabetimen aýyratyn naýqastar meditsinalyq kómek pen dári-dármekke qol jetkizýde qiyndyqtarǵa tap bolýda degen aqparat taralýda. Bul málimet shyndyqqa janaspaidy, dep habarlaidy Ult.kz.
Búginde Qazaqstanda qant diabeti diagnozymen dispanserlik esepte 535 myńnan astam adam, onyń ishinde 5 625 bala tirkelgen. Memleket bul azamattardyń barlyǵyn qajetti dári-dármektermen tegin qamtamasyz etip otyr.
Ár patsientke jumsalatyn shyǵyn onyń jaǵdaiyna qarai jylyna 618 teńgeden 6,5 mln teńgege deiin ózgeredi. Jalpy alǵanda, el boiynsha jyl saiyn 46 milliard teńge osy maqsatqa bólinedi.
Osy saladaǵy qajettilikterdiń artýyna bailanysty 2025 jyldyń qańtar aiynan bastap qant diabeti kezinde dári-dármekpen qamtamasyz etý Mindetti áleýmettik meditsinalyq saqtandyrý (MÁMS) júiesi arqyly júzege asyrylatyn bolady. Bul qadam qarjylandyrýdyń turaqtylyǵyn jáne ýaqtylyǵyn qamtamasyz etedi.
Qazirgi tańda qant diabetimen tirkelgen patsientterdiń 96%-y MÁMS júiesine qatysýshy bolyp tabylady. Al balalar, zeinetkerler, júkti áielder, múgedektigi bar azamattar jáne basqa da áleýmettik osal toptar úshin saqtandyrý jarnasyn memleket ózi tóleidi.
Sonymen qatar, Densaýlyq saqtaý ministrligi qant diabetin emdeýge arnalǵan dárilik zattar tizbesin jańartty. Endi tizimde tek tiimdiligi ǵylymi turǵydan dáleldengen preparattar ǵana bolady. Sondai-aq, jańa býyn insýlini – deglýdekke qoljetimdilik keńeiip otyr. Endi bul preparat barlyq sanattaǵy patsientterge, sonyń ishinde júkti áielder men balalarǵa da qoljetimdi bolady.
Qant diabeti – myńdaǵan qazaqstandyqtardyń ómir sapasyna tikelei áser etetin mańyzdy aýrýlardyń biri retinde memlekettiń erekshe baqylaýynda qala beredi. Memleket tarapynan bul baǵyttaǵy qoldaý sharalary toqtamaidy.
