Kandidattyń sailaý qoryna túsken jasyryn qarajat biýdjet kirisine alynady. Bul týraly búgin QR Ortalyq sailaý komissiiasynyń hatshysy Sábila Mustafina aitty, dep habarlaidy QazAqparat tilshisi.
«QR Sailaý týraly» týraly Konstitýtsiialyq zańynyń 20-baby 3-tarmaǵyna sáikes, memleket prezidenttikke kandidattarǵa óz baǵdarlamasymen buqaralyq aqparat quraldaryna shyǵý úshin qarajattyń teń bóligine kepildik beredi. Kandidattarǵa BAQ-qa shyǵý úshin qarajat bólý qaǵidalary men kólemi týraly 2018 jylǵy 25 tamyzdaǵy №12202 qaýlyǵa sáikes, kandittarǵa teledidarda - 15 minýt, radioda - 10 minýt, merzimdi baspasózde nemese jelilik basylymdarda 0,1 baspa paraqtan aspaityn eki maqala jariialaý úshin birdei kólemde qarajat bólý kózdelgen. Sondai-aq, «Sailaý týraly» Konstitýtsiialyq zańnyń 33-baby 2-tarmaǵyna sáikes, respýblikalyq biýdjet qarajatynan kandidattyń sailaý aldynda kópshilik sharalaryn ótkizýge, úgit materialdaryn shyǵarýǵa, kólikke jumsaityn shyǵyndary jabylady. Osyǵan orai, OSK qaýlysynyń jobasy ázirlengen. Qaýly jobasymen QR Prezidenttigine kandidattyń shyǵyn mólsheri 7 mln 331 200 teńge kóleminde belgilenip otyr», - dedi ol.
Sonymen qatar, komissiia hatshysy prezidenttikke kandidattyń sailaý qory týraly aitty.
«Birinshiden, kandidattyń óz qarajaty jáne ony usynǵan respýblikalyq qoǵamdyq birlestik kandidatqa bólingen qarajattyń jalpy somasy zańnamada belgilengen eń tómengi jalaqynyń 12 000 ese mólsherinen aspaidy, bul - 510 000 000 (bes júz on million) teńge. Ekinshiden, respýblikanyń azamattary men uiymdarynyń erikti qaiyrymdylyǵynyń jalpy somasy zańnamada belgilengen eń tómengi jalaqy mólsherinen 15 000 eseden aspaidy, bul - 637 500 000 teńgeni quraidy», - dedi OSK hatshysy.
Onyń aitýynsha, belgilengen mólsherden tys artyq túsken aqsha qarajaty sailaý qorlaryna eseptelýge jatpaidy jáne olardy engizgen azamattar men uiymdarǵa qaitarylady. Jasyryn qaiyrymdylyq qarajaty respýblikalyq biýdjet kirisine aýdarylady.
«Sailaý qorlaryna tek zańdy jolmen alynǵan qarajat qana jiberilýi múmkin. Sailaý qorynyń qarajatyna bilik etý quqyǵy Qazaqstan Respýblikasy Prezidenttigine kandidattarǵa ǵana tiesili», - dedi S.Mustafina.
