TMD baqylaýshylar missiiasynyń basshysy Sergei Lebedev prezidenttikke talasqan kandidattarǵa baǵa berdi, dep habarlaidy Sputnik Qazaqstan.
Aitýynsha, prezidenttikke úmitkerler jiti ári sapaly iriktelgen.
"Barlyq kandidat ta joǵary bilimdi, memlekettik jáne qoǵamdyq qurylymdarda jumys ótili bar laiyqty adamdar. Memlekettegi eń joǵary qyzmetke usynylatyn kandidattyń boiynan tabylýǵa tiis qasietterge ie. Kandidattardyń pozitsiiasy týraly aitar bolsam, sailaýaldy naýqan barysynda qara piar bolmaǵany qýantady. Prezidenttikke kandidattar sailaýshylardy óz baǵdarlamasymen tanystyrýǵa kóńil bóldi. Qarsylastarynyń baǵdarlamalaryn synaýdan aýlaq boldy. Bul naýqannyń tynysh ótýine septigin tigizdi", - dedi Lebedev Ortalyq sailaý komissiiasynda ótken baspasóz máslihatynda.
Onyń pirikinshe, saiasi naýqan ashyq ótti. Oǵan sailaý ýchaskelerinde atmosfera dálel. Lebedevtiń aitýynsha, barlyq kandidat óz sailaýaldy baǵdarlamasynda halyqtyń arman-maqsaty men muń-muqtajyn eskergen.
"Olardyń basty maqsaty halyqtyń ómirin jaqsartý, Qazaqstan jerinde beibitshilik pen turaqtylyqty qamtamasyz etý boldy", - dedi Lebedev.
TMD baqylaýshylar missiiasy – barlyǵy 174 adam Qazaqstanda bir ai boiy jumys istedi. Olar 1000-nan astam sailaý ýchaskesin aralap shyqty. Monitoring Qazaqstan aýmaǵynda, sondai-aq diplomatiialyq jáne konsýldyq mekemeler janynan ashylǵan sailaý ýchaskeleri bar basqa elderde de júrgizildi. Sailaý naýqanyn barysynda TMD baqylaýshylar eshqandai zańbuzýshylyq tirkemegen.
