QR Prezidenttigine kandidat Jumatai Áliev memlekettik tildi meńgermegen. Mundai qorytyndyny búgin QR Ortalyq sailaý komissiiasy janynan qurylǵan QR Prezidenttigine kandidattyń memlekettik tildi meńgerý deńgeiin anyqtaityn lingvistikalyq komissiia shyǵardy, dep habarlaidy "Ult aqparat".
«Búgin «Halyq demografiiasy» qoǵamdyq birlestiginen prezidenttikke úmitker retinde usynylǵan Jumatai Áliev emtihanǵa berilgen ýaqytyn tolyq paidalandy. Komissiia barlyq kezeńderdi jan-jaqty talqylady», - dedi úmitkerdiń emtihan nátijesin jariia etken lingvistikalyq komissiia múshesi Ádil Ahmetov.
Onyń aitýynsha, úmitker birinshi kezeńde «Memleket jáne din» degen taqyrybynda shyǵarma jazǵan. 1,5 saǵat otyrǵanymen, taqyrypty múlde asha almaǵan.
«Taqyryp múldem ashylmaǵan, sóilemderiniń barlyǵy júiesiz. Din máselesi de múldem ashylmady deýge bolady, ústirt. Ekinshi kezeńde Muhtar Áýezovtiń «Abai joly» romanynyń 2-tomynan úzindi oqydy. M.Áýezovtiń sózderi «qyzdyń jiǵan júgindei» ǵoi. Mátinniń óz «áýezi bar. Bul jerde de óziniń shorqaqtyǵyn baiqatty. Úshinshi kezeńde «Yrys aldy - yntymaq» taqyrybynda baiandama jasady. «Yrys aldy - yntymaq» taqyryby múldem ashylmady. Taǵy da ústirt boldy. Saýatsyz boldy. Máselen, birinshi kezeńdegi shyǵarmada bas-aiaǵy 13 sóilemde 19 qate. Ózderińizge belgili 8 den assa ol shyǵarma teris baǵalanady. Sondyqtan prezidenttikke úmitker Jumatai Áliev memlekettik tildi erkin meńgermegen degen komissiia qorytyndysy shyqty», - dedi ol.
Aita keteiik, Jumatai Áliev memlekettik tildegi emtihannan súringen alǵashqy úmitker. Buǵan deiin kandidattardyń barlyǵy bul synaqtan ótken bolatyn.
Jumatai Áliev 1952 jyldyń 20 maýsymynda Jambyl oblysynda dúniege kelgen. Leningrad memlekettik ýniversitetin, Almaty halyq sharýashylyǵy institýtyn bitirgen, filosof, ekonomist. Filosofiia ǵylymdarynyń doktory, professor, Qazaqstan Respýblikasy UǴA akademigi. Qazaqstan Respýblikasy Prezidenti Ákimshiliginiń Qazaqstan halqy Assambleiasy hatshylyǵynyń meńgerýshisi, Qazaqstan halqy Assambleiasy tóraǵasynyń orynbasary, Parlament Májilisiniń depýtaty bolǵan.
