Dini qyzmet týraly zań jobasynda destrýktivti dini aǵymdardyń syrtqy kórinisi bolyp tabylatyn atribýttar, mysaly qaýǵa saqal men qysqa balaq, sondai-aq betti jaýyp turatyn kiim-keshekti qoǵamdyq oryndarda kiip júrýge shekteý qoiylmaq. Bul týraly din isteri jáne azamattyq qoǵam ministri Nurlan Ermekbaev aitty, dep habarlaidy Sputnik Qazaqstan tilshisi.
Búgin májiliste Nurlan Ermekbaev dini qyzmet jáne dini birlestikter máseleleri boiynsha zań jobasyn tanystyrdy. Zań jobasyndaǵy ózgeristerdiń biri – bet-álpetti jaýyp turatyn kiimdi qoǵamdyq oryndarda kiip júrýge jáne destrýktivti dini aǵymdardyń syrtqy kórinisi bolyp tabylatyn atribýttardy, kiim-keshekti qoǵamdyq oryndarda paidalanýǵa, kiip júrýge jáne taratýǵa, sondai-aq olardyń ideologiiasyn taratýǵa shekteý qoiý.
"Zań jobasynda destrýktivti dini aǵym belgilerin paidalaný jáne kópshilikke kórsetýge tyiym salý kózdelip otyr. Olar zańnamalyq aktide bekitiledi. Bul belgilerdiń ishine tek syrtqy ǵana emes, ideologiialyq, psihologiialyq, uiymdastyrýshylyq ári dini joralǵy belgileri kiredi. Destrýktivti dini aǵymdardyń syrtqy belgilerine islamdaǵy radikaldy aǵymdarǵa tán dúnieler jatqyzylýy múmkin. Mysaly, betti jaýyp turatyn kiim, balaǵy qysqa shalbar, saqal bolýy múmkin. Olar jeke-jeke emes, birge qarastyrylady. Arnaiy saraptama arqyly olardyń destrýktivti aǵymǵa jatatyny-jatpaitynyna baǵa beriledi", — dedi Ermekbaev jýrnalisterge.
Onyń aitýynsha, bul belgiler zańnamalyq normativtik-quqyqtyq aktide bekitiledi.
"Bul aktide eskizder nemese fotosýretter berilýi de múmkin. Usynys boiynsha, bul IIM, UQQ, Din isteri jáne azamattyq qoǵam ministrliginiń birlesken buiryǵy bolady. Mamandar bul belgilerdiń destrýktivti dini aǵymǵa jatatyny-jatpaitynyn anyqtaidy. Iaǵni, teris aǵymnyń birneshe syrtqy belgisi bar azamatpen tildesip, onyń dini kózqarasy jaily sóilesedi. Tek qajet bolǵan jaǵdaida oǵan eskertý jasalady", — dedi ministr.
