Sáken Seifýllin atyndaǵy Qazaq agrotehnikalyq ýniversitetiniń professory, ekonomika ǵylymdarynyń kandidaty Qairat Bodaýhan qandastardyń qai óńirlerge kóbirek kóshetinin aityp berdi, dep habarlaidy QazAqparat.
«2003-2007 jyldar arasyndaǵy bes jylda 60 myń otbasyǵa kvota belgilengen jáne elimizge 250 myńnan astam qandas kóship keldi. Iaǵni, sol kezde jyl saiyn 50 myńnan astam etnikalyq qazaq kóship kelse, qazir bul kórsetkish bar-joǵy 1358 adam ǵana», - dedi Qairat Bodaýhan «Otandastar qory» KEAQ janyndaǵy qoǵamdyq komissiianyń otyrysynda.
Onyń aitýynsha, 2017-2020 jyldary kvota sany nebári 7 411 bolsa da, kvotadan tys úsh jylda 2020 jyldyń bastapqy 8 aiyn qosa eseptegende, 60 707 qandas elge qonys aýdarǵan. Sońǵy 5 jylda 70 933 qandas kóship kelgen.
«Bul rette kvota bólinbegen 5 óńirge – Almaty, Jambyl jáne Túrkistan oblystaryna jáne Almaty men Shymkent qalalaryna 32 222 adam, al Mańǵystaý oblysyn esepke alǵanda – 43 006 adam kelgen, iaǵni tutas qandastar sanynyń 61%-y osy óńirlerge kelgen. Bul sandar adamdardyń ómir súrýge qolaily aimaqtardy tańdaitynyn kórsetedi, iaǵni tabiǵi-klimattyq jáne ekonomikalyq faktorlarǵa basymdyq beriledi. Týystyq qatynastardyń bolýy da mańyzdy», - deidi ǵalym.
