Qazaqstanǵa kóshken qandastardyń 62,7 paiyzy eńbekke qabiletti jasta. Bul týraly S. Seifýllin atyndaǵy Qazaq agrotehnikalyq ýniversitetiniń professory, ekonomika ǵylymdarynyń kandidaty Qairat Bodaýhan aityp berdi, dep habarlaidy QazAqparat.
«Qandastardy memleket biýdjetine artyq salmaq pen qoǵamdaǵy destrýktivti kúsh degen kózqarasty ózgertetin ýaqyt jetti. Mońǵoliianyń, Qytai men Ózbekstannyń qazaqtary kóbinese dástúrli sharýashylyq júrgizý daǵdylary men tásilderin saqtap qaldy. Sheteldegi qazaqtardyń turatyn elderinde titýldyq ult bolmaýy jáne memlekettik qoldaýdyń túrli sharalaryna basymdyq túrde ielik etpeýi olardy ekonomikalyq belsendi bolýǵa jáne ál-aýqatty arttyrýdyń ózindik ustanymyn qalyptastyrýǵa jeteledi», - dedi Qairat Bodaýhan «Otandastar qory» KEAQ janyndaǵy qoǵamdyq komissiianyń otyrysynda.
Bul jaǵdai sheteldik qazaqtar arasynda negizinen ózderiniń ishki resýrstaryna jáne kásipkerlik áleýetti iske asyrýdyń óz múmkindikterine súienýge degen kózqarastar júiesin qalyptastyrdy. Qandastar mekendegen elderdegi kásipkerlik bastamashylyq pen ekonomikalyq derbestik erekshelikterine sáikes, sheteldik qazaqtar básekelestik orta men biznes-bastamalaryn iske asyrýǵa burynnan daǵdyly jáne yntaly.
Elge kelgen qandastardyń 62,7 paiyzy - eńbekke qabiletti jastaǵylar, 30,7 paiyzy – jasóspirimder men balalar, tek 6,6 paiyzy ǵana – zeinet jasyndaǵylar bolyp otyr. Bul memleket úshin eń ekonomikalyq belsendi halyq bolyp esepteledi.
«Qandastar - qoǵamdyq igilikterdiń óndirýshileri. Olardyń eńbegin, ásirese «qarapaiym zattar ekonomikasyn» ilgeri jyljytýda qoldanýǵa bolady. Qandastardyń Qazaqstan ekonomikasyna qosatyn úlesi retindegi ekonomikalyq áleýetin jalpy qosylǵan qun túrinde qarastyrsaq, eńbekke qabiletti 100 myń qandas tek aýyl sharýashylyǵynda ǵana jumys isteidi dep boljasaq, bes jyl ishinde áleýetti túrde 771 mlrd teńge jalpy qosylǵan qun mólsherinde tabys ákeledi. Osylaisha, tek qana aýyl sharýashylyǵy salasynda jumys isteitin bir qandas jyl saiyn Qazaqstan ekonomikasyna 2,9 mln teńge tabys ákeledi», - dep atap ótti Q. Bodaýhan.
Al aýyl sharýashylyǵy salasynda da, ekonomikanyń basqa da sektorlarynda jumys isteitin qandas orta eseppen jyl saiyn Qazaqstan ekonomikasyna 4,8 mln teńge ákele alady. Budan bólek, halyqtyń ósýine bailanysty tutynýshylyq naryqtyń ósýin eskerý qajet.
«Sonymen birge, qandastar aǵynynyń respýblikaǵa úlesi tek ekonomikalyq áserlermen ǵana shektelmeitini anyq. Onyń rýhani, mádeni jáne ulttyq bolmysymyzdyń qalyptasýyna qosyp jatqan úlesi baǵa jetpes. Ony esh tsifrmen esepteýge bolmaidy», - dedi Q. Bodaýhan.
