Bul máselege bailanysty qazir kelissózder júrip jatyr. Qazaqstandyq kásipqoi boksshy Qanat Islam braziliialyq Robson Asisspen 17 aqpanǵa belgilengen jekpe-jekten keiin Astanada ótetin boks keshine daiyndyqty bastai alady. Sportshynyń ókili Berik Sultan Vesti.kz basylymyna bergen suhbatynda boksshynyń aldaǵy josparlary jaily aityp berdi.
«Mádeniet jáne sport ministri 29 qazanda ótken jekpe-jekten keiin Qanat Islamdy qabyldap, oǵan Memleket basshysynyń quttyqtaýyn jetkizdi. Sol kezdesýde EXPO halyqarylyq kórmesin ótkizý barysynda úlken boks keshin uiymdastyryp, sonda Qanat Islamdy shaqyrý týraly oi týyndaǵan bolatyn», - dedi Berik Sultan.
Sondai-aq, Qanat Islamnyń ókili qazaqstandyq boksshynyń EXPO qarsańynda ótkiziletin boks keshine qatysýǵa daiyn ekenin aitty. «Keshtiń naqty qai aida ótetini belgisiz. Boks keshi jazdyń sońynda ótetin bolsa, Qanat mamyr aiynda AQSh-ta taǵy bir jekpe-jek ótkizip, Astanadaǵy boks keshine daiyndyqty bastaýǵa daiyn. Eger odan erte ótetin bolsa, Qanat Islam Assispen judyryqtasqan soń, daiyndyqty bastai beredi. Boks keshine bir kúnde Gennadii, Beibit, Janat pen Qanat siiaqty boksshylar qatyssa, bul kesh qatysýshylar quramy jaǵynan myqty bolmaq», - dedi boksshysynyń ókili.
Aita keteiik, keshe Boxing Legends TV internet-arnasynyń Twitter jelisindegi paraqshasynda orta salmaqta WBA (Super), IBO, WBC jáne IBF tujyrymdary boiynsha álem chempiony Gennadii Golovkin (36-0, 33 KO) jáne osy salmaqtaǵy WBO belbeýiniń iegeri aǵylshyn boksshysy Billi Djo Sonders (24-0, 12 KO) jazda Qazaqstanda judyryqtasýǵa kelisti degen málimet shyqqan bolatyn. Eger, bul sózderdiń barlyǵy rastalyp jatsa, qos batyrymyz Astanada bir kúnde judyryqtasýy múmkin.
