Qazaqstandyq boksshy Qanat Islam meksikalyq Saýl «Kanelo» Alvarespen judyryqtasýǵa daiyn. Bul týraly ol Almatyda namibiialyq Ýolter Kaýtondokvamen bolatyn jekpe-jekke arnalǵan baspasóz máslihatynda aitty, dep habarlaidy QazAqparat.
«Syn túzelmei, min túzelmeidi. Búgin baryp tór meniki deýge bolmaidy. Árkimniń óz deńgeii bar. Qyran shyńǵa qalyqtap shyqsa, jylan órmelep shyǵady. Jetistikke ár adam ártúrli joldarmen keledi. Alla Taǵala bireýge barmaqtai baq beredi, bireýge ony da bermeidi. Biraq biz soǵan tyrysyp jatyrmyz. Árqashan bir qadam qalǵan kezde, birese jaraqat aldyq, artqa ysyryldyq... Maǵan múmkindik berse, men qazir Kanelomen judyryqtasýǵa daiynmyn»,-dedi Qanat Islam.
Onyń aitýynsha, ringke chempiondarmen shyǵý úshin qomaqty qarajat pen jaqsy qoldaý qajet.
«Amerikada 20 mln meksikalyq turady, 10 mln filippindik turady, latynamerikalyqtar, ýkrainalyqtar men orystar kóp. Biz ol jerde joqpyz. Solai ǵoi. Men Amerika halqyna qyzyq emespin. Tek qazaqtarǵa ǵana qyzyqpyn. Al endi seni Amerikaǵa kóbirek tanytý úshin seniń artyńda úlken demeýshileriń bolý kerek... Búgin baryp alyp, tór meniki dep aiqailaityn negiz joq. Meksikada boks keshteri, kún saiyn, apta saiyn ótedi. Kanelo óziniń 30-0 rekordyn Meksikada jasap keldi. Sol rekordymen ony Amerikaǵa alyp keldi. Bizde ótip jatqan bir kesh joq»,- dedi Qanat Islam baspasóz máslihatynda.
Sondai-aq, Qanat Islam chempiondyq jekpe-jekterge daiyn ekenin jetkizdi.
«Qudai qalasa, chempiondyq ataqta alys emes. Eger men almasam da, basqa baýyrlarym alady», - dedi ol.
Bylǵary qolǵap sheberi, QP bas direktory Darhan Muhtarbekke kórsetken qoldaýy úshin alǵysyn bildirip, aldaǵy jekpe-jekte jeńiske jetýge múmkindik baryn aitty.
«Biz ár qarsylasqa tyńǵylyqty daiyndaldyq. Bul boks, munda aldyn ala boljai almaisyz, ring bárin sheshedi», - dedi ol.
«Qazir aldaǵy jekpe-jekke belsendi daiyndyq júrýde. Qazirdiń ózinde aýqymdy jattyǵýlar ótip jatyr. Taýda oqý-jattyǵý jiynyn ótkizdik. Boks árdaiym daiyndyqty qajet etedi. Bul óte aýyr jumys desek te bolady. Jattyǵýlardyń bári birdei kórinedi, alaida dál sol jattyǵý barysynda jetildiretin, jumys isteý kerek tustardy anyqtaimyz. Bizde ár túrli tehnikalyq jáne taktikalyq ádisterdiń jiyntyǵy bar. Kelesi jekpe-jekte Qanattyń qarsylasy óte salmaqty, ol WBO nusqasy boiynsha álem chempiony Demetriýs Andradeni 12 raýndtyń bárinde súiretip, azaptady. Ol 4 ret nokdaýnǵa tústi, biraq báribir ornynan turyp judyryqtasýdy jalǵastyrǵan boksshy. Iaǵni, ol - myqty qarsylas. Aldaǵy jekpe-jek óte qyzyqty bolady, biz barlyq tehnikalyq jáne taktikalyq arsenalymyzdy kórsetemiz. Biz aldyn ala eshqandai boljam jasamaimyz, biraq jeńiske jetemiz dep úmittenemiz», - dedi Bagaýdin Bekov.
Boks keshinde tanymal qazaqstandyq boksshylar men AQSh, Qytai jáne Eýropa elderiniń ókilderiniń qatysýymen 10 jekpe-jek ótedi. Olardyń arasynda debiýtanttar da bar. Aiqas 6 raýndtyq, 8 raýndtyq bolady. Keshtiń basty jekpe-jeginde Qanat Islam (26-0, 21 KO) namibiialyq Ýolter Kaýtondokvamen kezdesedi. (18-1, 17 KO).
«Almatydaǵy boks QazSport jáne Qazaqstan arnalarynda, sondai-aq QP TV tikelei efirinde kórsetiledi», - dedi Qazaq Promotions atqarýshy direktory Azamat Mádi.
Bul jekpe-jek keshi 26 qazan kúni, Balýan Sholaq atyndaǵy sport saraiynda ótedi. Bastalýy 17:00-de.
