Qazaqstandyq kásibi boksshy Qanat Islam Gennadii Golovkin men ýkrainalyq Sergei Derevianchenko arasynda IBF jáne IBO nusqalary boiynsha orta salmaqtaǵy álem chempiony titýly úshin ótetin jekpe-jekten ne kútetinin aitty, dep habarlaidy "Ult aqparat".
«Men Sergei Derevianchenkomen ringte eki ret kezdeskenmin. Birinshisinde jeńiske jettim, odan keiin Almatyda tóreshilerdiń sheshimimen jeńildim, alaida ol meniki edi. Sergei - óte myqty jáne jaqsy boksshy, degenmen Golovkinniń deńgeii joǵaryraq. Sergei qarsy turýǵa tyrysady, alaida ońaiǵa soqpasa da, GGG ony aldai alady. Golovkin jeńimpaz atanady dep oilaimyn. Oǵan jekpe-jekte tek sáttilik, jeńis, Qazaqstannyń týyn taǵy da bir márte kóterýin tileimin», - dedi sportshy.
Kásipqoilar arasyndaǵy burynǵy álem chempiony qazaqstandyq Gennadii Golovkin (39-1-1, 35 KO) men ýkrainalyq Sergei Derevianchenko (13-1, 10 KO) arasyndaǵy aiqas 5 qazan kúni Niý-Iorktegi Madison Square Garden arenasynda ótedi. Qazaqstandyqtar jekpe-jekti 6 qazan kúni tańerteń tikelei efirden tamashalai alady.
Al Qanat Islam (26-0, 21 KO) kezekti jekpe-jegin 26 qazan kúni Almatydaǵy Balýan Sholaq atyndaǵy sport saraiynda ótkizedi. Onyń qarsylasy namibiialyq Ýolter Kaýtondokva (18-1, 17 KO) bolmaq.
