Qazaqstandyq boksshy Qanat Islam (23-0, 19 KO) Worldboxingnews.net saityna bergen suhbatynda óziniń kelesi jekpe-jegin qashan ótkizetinin aityp berdi, dep jazdy Sports.kz.
«Kásibi boksta júrgenime bes jyl boldy, bul az ýaqyt emes. Osy ýaqyt aralyǵynda 23 aiqasta jeńgen ekenmin, onyń 19-yn nokaýtpen aiaqtadym. Qazir uiymdardyń reitingterinde joǵary orynda turmyn jáne "álem chempiony" atanatyn ýaqyt jetti dep oilaimyn. Men toqtap tura almaimyn jáne belbeýlerdi jeńip alýym kerek», - dedi Q. Islam.
Qanattyń aitýynsha, ol Qazaqstannan AQSh-qa birneshe kún buryn ushyp kelgen.
«Meniń demalysym aiaqtaldy. Qazir Floridada promoýterim Nelson Lopestiń jattyǵý bazasynda jumys istep jatyrmyn. Qazir jattyǵýlarǵa kirisip kettim, mamyr aiynyń sońynda ózimniń 24-shi jekpe-jegimdi ótkizemin. Qarsylasymnyń esimi osy aptada belgili bolatynyna úmittenemin. Biylǵy jyl men úshin mańyzdy, sebebi 9 qyrkúiek kúni Qazaqstanda tamasha boks keshin ótkizemin. Meniń basty maqsatym - álem chempiony ataný, sondyqtan mamyr aiyndaǵy bokstan keiin osy aiqasqa daiyndalamyn. Kelissózder jaqynda bastalady jáne men bul jekpe-jek arqyly álem jurtshylyǵynyń nazary Astanaǵa aýady dep úmittenemin. Bul shoýǵa 15 myń kórermen jinalatyny boljanyp otyr», - dedi Q.Islam.
