QR Energetika ministri Qanat Bozymbaev elimizge tórtinshi munai óńdeý zaýyty qajet ekenin aitty, dep habarlaidy "Ult aqparat" Kapital.kz saityna silteme jasap.
Ministrdiń aitýynsha, qazirgi tańda bul máseleni arnaiy jumys toby qarastyryp jatyr.
«Meniń pikirimshe, Qazaqstanǵa tórtinshi munai óńdeý zaýyty qajet. Qazirgi tańda bul máseleni qarastyryp jatyrmyz. Zaýytty salý - bir jyldyń jumysy emes. Janar-jaǵarmai materialdaryna suranys artýda. Bizdiń boljamymyz boiynsha, shamamen 2022 jyly munai ónimderiniń importyn ósirý qajet bolady. Osy ýaqytqa deiin tórtinshi zaýytty salyp úlgergen jón. Artyp kele jatqan suranysty qanaǵattandyrýǵa qoldanystaǵy úsh zaýyttyń qýaty jetpeidi», - dedi Energetika ministri.
Interviý barysynda Qanat Bozymbaev aldaǵy jyly jańa munai óńdeý zaýytynyń tehnikalyq-ekonomikalyq negizdemesin daiyndaý josparlanyp otyrǵanyn atap ótti. Ministrdiń sózinshe, 2019 jyly investorlardy tarta otyryp, atalǵan zaýyttyń qurylysyn bastaý josparda bar.
Aita keteiik, qazirgi tańda elimizde 3 munai óńdeý zaýyty bar. Olar Atyraý, Pavlodar, Shymkent qalalarynda ornalasqan.
