Ánshi Dimash Qudaibergenniń ákesi Qanat Aitbaev ulynyń reseilik jobalarǵa shaqyrtylýy jaily jańalyqtarmen bólisti, dep habarlaidy QazAqparat tilshisi.
«Dimashtyń kontsertine álemniń 45 elinen meimandar kele jatyr. Sondyqtan, kontserttegi kórermenderdiń deni aǵylshyn tildi ǵana bolmasy anyq. Kontsertke álemniń túkpir-túkpirinen qyzyǵýshylyq tanytyp otyrǵandar bar», - dedi Qanat Aitbaev Mádeniet jáne sport ministri Arystanbek Muhamediulymen kezdesý barysynda.
Qanat Aitbaev atap ótkendei, Dimashtyń álemdik týry byltyr 27 maýsymda Astanada «Bastaý» degen kontsertten bastalǵan. Osydan keiin gastrol Qytaida jalǵasyp, Chansha, Fýdjoý, Shenjen qalalaryndaǵy stadiondarda Dimashtyń sátti kontsertteri ótken.
«Máskeýden de kelesi jylǵa usynys keldi. Tek týr uiymdastyryp qana qoimai, ártúrli pýblikaǵa ózine sai beiimdele óner kórsetsek deimiz. Ózderińiz biletindei, qazirgi tańda Dimash birneshe tilde án aitady. Sebebi, kontsert ótetin árbir pýblikany syilaý kerek. Sondyqtan, bul jumys zor daiyndyq pen ýaqytty talap etedi», - dedi Qanat Aitbaev.
Ánshiniń ákesi kontsertterdiń ótkizilýine Mádeniet jáne sport ministrligi tarapynan kóp qoldaý kórsetilip jatqanyn tilge tiek etti.
«Qazaq aitpaqshy, «jaiaýdyń shańy, jalǵyzdyń úni shyqpaidy». Kóp bolyp, el bolyp kótergen júk jeńil. Osy jerde qanshama jankúier men tyńdarman bar, el-jurt bar, eldiń basshylyǵy bar - qoldaý jasap jatqannan keiin osyndai jetistikterge jetip jatyrmyz. Amandyq bolsa aldaǵy ýaqytta túsip jatqan hattardyń negizinde Almaty nemese Astana qalalarynda kontsert jasasaq degen oi bar. Onyń bári júzege asady», - dedi Qanat Aitbaev.
Ol sonymen qatar, mádeniet salasynda memleketaralyq bailanystar bolyp jatqanyn atap ótti.
«Osyǵan bailanysty «ARS» kompaniiasynyń basshysy Igor Iakovlevichten (Krýtoi - avt.) ártúrli mádeni almasý jóninde, ózderińiz aitqandai «Pesnia goda» sekildi jobalarǵa qatysý týraly bizdiń ministrlikke kóptegen hattar kelgen eken. Sonyń negizinde amandyq bolsa, shyǵarmashylyq bailanystarymyz jalǵasatyn bolady. Keibir adamdar: «Dimash tek bir elge táýeldi bolyp qalyp qoia ma?» dep suraq qoiady. Másele olai emes. Qazaqtyń óneri qai jerde suranysqa ie - sol jerdiń barlyǵynda da kórsetilýi tiis dep esepteimiz. Qandai elden qyzyǵýshylyq túsip, qai elden shaqyrý túsedi - sol eldiń eń ádemi baǵdarlamalaryna qatysý bizdiń oiymyzda bar. Sol sekildi tek Resei emes, Ulybritaniia emes, kóptegen memleketterdiń kóptegen telearnalarynyń, kontserttik ujymdarynyń shaqyrýymen birlesken jobalar júzege asatynyn aita ketkim keledi», - dedi Qanat Aitbaev.
Eske sala ketsek, búgin QR Mádeniet jáne sport ministri Arystanbek Muhamediuly Qanat Aitbaevpen jáne Dimash Qudaibergenmen kezdesip, 19 qarashada ótetin kontserttiń mán-jaiyn talqylaǵan bolatyn. Ánshiniń ákesiniń aitýynsha, Dimash Londondaǵy kontsertte ánderiniń 60 paiyzyn qazaq tilinde shyrqaidy.
