"Ázil álemi" teatrynyń akteri, ázilkesh Qanat Áljapparov Bizben Podcast jobasynyń alǵashqy qonaǵy boldy. Ol taiaýda shyqqan "Piznesmen Qanat" serialy, saiasi ázilder týraly áńgime qozǵady. Sonymen qatar, koronavirýs, vaktsina týraly oiyn aitty, - dep habarlaidy Tengrinews.kz.
Qazir YouTube hostinginde kórsetilip jatqan "Piznesmen Qanat" serialynda basty rólde oinaǵan ázilkesh qazirgi jobalardaǵy bylapyt sózder týraly oiyn aitty. Sondai-aq, teatrda óner kórsetkenge qaraǵanda kinoǵa túsý qiyndaý ekenin málimdedi.
"Stand-up janryna qaraǵanda kino qiyndaý. Negizi qai jumys ta ońai emes. Biraq kino sál sharshatady. "Motor, dýbl, stop" degen áńgimeler. Al teatrda sahnaǵa shyǵasyń, mátinińe daiyndalyp, jattap alsań boldy", - deidi Qanat Áljapparov.
Sonymen qatar, ázilkesh koronavirýs juqtyrǵanyn aitty. Endi vaktsina saldyrmaq.
"Men de jurt qatarly ilip aldym. Dám sezbei, iis sezbei, biraq temperatýra bolǵan joq. Vaktsina saldyramyn. Kishkentai kezimizden vaktsina egedi ǵoi. Birinshi muǵalimderge, politseilerge salyp jatyr. Bylai qarasań, úkimet aqymaq emes, onyń bailyǵy - munai ne altyn emes, halqy. Halqyn qyrmaityn shyǵar olar. Sol úshin vaktsina saldyr dese, saldyrý kerek. Men mindetti túrde saldyramyn", - dedi ázilkesh.
Akter áńgimesinde qurǵaqshylyq máselesin de kóterdi. Onyń sózinshe, Syrdariia sýy azaiyp, Qyzylordadaǵy sharýashylyqtar sý tappai otyr eken.
"Óz óńirime bailanysty aitaiyn. Qyzylordada Syrdariianyń sýy óte úlken problema bolyp otyr. Syrdariia qansha elden ótip, Aral teńizinen kelip quiatyn. Qyzylordada sharýashylyqtar kúrishke sý jetkize almai otyr, qurǵaqshylyq. Bilikke kelsem, Ózbekstan, Qyrǵyzstanmen kelisip, osy máseleni shesher edim. Syrdariia - búkil qazaqtyń problemasy", - dedi Qanat Áljapparov.
