Shveitsariiada ótip jatqan 2026 jylǵy hokkeiden álem chempionatynyń toptyq kezeńi aiaqtalyp, plei-offqa shyqqan quramalar tolyq belgili boldy. Endi álem birinshiligindegi basty tartys shirek final matchtarymen jalǵasady, dep habarlaidy Sportinside.kz.
B tobyndaǵy sońǵy oiynda Kanada quramasy Chehiiamen kezdesip, 3:2 esebimen jeńiske jetti. Bul matchta kanadalyqtar qarsylasyn ońai uta qoiǵan joq. Chehiia oiyn barysynda qarsylyq kórsetkenimen, Kanada úshinshi kezeńde basymdyq tanytyp, jeńisti julyp aldy.
Kanada sapynan Maklin Selebrini eki shaiba soǵyp, komandanyń jeńisine úlken úles qosty. Ol 35 jáne 48-minýttarda gol avtory atandy. Al Djon Tavares 50-minýtta sheshýshi shaibany qaqpaǵa baǵyttap, kezdesýdiń núktesin qoidy.
Chehiia quramasynda Marek Alsher men Dominik Kýbalik kózge tústi. Alaida olardyń goldary komandasyn jeńilisten qutqara almady. Osy matchtan keiin Kanada 20 upai jinap, B tobyn kóshbasshy retinde aiaqtady. Chehiia 13 upaimen úshinshi oryn aldy.
A tobynda týrnir qojaiyny Shveitsariia Finliandiiadan 4:2 esebimen basym tústi. Shveitsariialyqtar kezdesýdi belsendi bastap, alǵashqy minýttardan-aq qarsylas qaqpasyna qaýip tóndirdi. Alań ieleri sapynan Attilio Biaska, Ken Iager jáne Niko Hishir nátijeli soqqy jasady. Ken Iager bul oiynda eki márte mergendigimen kózge tústi.
Finliandiia quramasynda Aleksandr Barkov dýbl jasady. Degenmen onyń eki goly finderdi jeńiske jetkize almady. Shveitsariia bul jeńisten keiin toptyq kezeńdi 21 upaimen aiaqtap, birinshi orynǵa ie boldy. Finliandiia 18 upaimen ekinshi satyǵa jaiǵasty.
Osylaisha, ár toptan tórt úzdik komanda shirek finalǵa joldama aldy. 1/4 finaldaǵy juptar tómendegidei:
- 28 mamyr, 19:20 – Finliandiia – Chehiia;
- 28 mamyr, 19:20 – Kanada – AQSh;
- 28 mamyr, 23:20 – Shveitsariia – Shvetsiia;
- 28 mamyr, 23:20 – Norvegiia – Latviia.
Aita keteiik, Ulybritaniia men Italiia quramalary elitalyq diviziondaǵy ornyn saqtai almady. Kelesi jyly olardyń ornyna Qazaqstan men Ýkraina quramalary álem chempionatynyń joǵary divizionynda oinaidy.
