Qazaqstanda joldardaǵy kóliktiń ortasha jyldamdyǵyn baqylaý júiesiniń qoldanylý aiasy keńeitiledi, dep habarlaidy ult.kz.
Ishki ister ministrliginiń málimetinshe, bul júie kóliktiń jyldamdyǵyn bir ǵana núktede emes, baqylaýdaǵy jol ýchaskesiniń búkil boiynda tirkeýge múmkindik beredi.
Iaǵni júrgizýshi kameraǵa jaqyndaǵanda ǵana jyldamdyǵyn tómendetip, keiin qaita arttyra almaidy. Júie joldyń belgili bir bóligindegi ortasha jyldamdyqty esepteidi.
Qazir ortasha jyldamdyqty baqylaý júiesi jalpy uzyndyǵy 2600 shaqyrym bolatyn 12 jol ýchaskesin qamtidy.
Jyl sońyna deiin taǵy 16 jol ýchaskesin osy júiege qosý josparlanyp otyr.
IIM bul shara jol-kólik oqiǵalarynyń sanyn azaityp, apat saldarynyń aýyrlyǵyn tómendetýge baǵyttalǵanyn atap ótti.
