Aqtóbede stýdentter men dárigerler kezdesýinde erte júktilik, jastar arasyndaǵy qylmys týraly aityldy, dep habarlaidy QazAqparat.
Kolledj stýdentteri búgin psiholog, ginekolog, politsiia qyzmetkeri men dermatolog mamanǵa ashyq suraq qoidy. Stýdenttermen kezdesý oblystyq densaýlyq saqtaý basqarmasy men «Arasan Aqtóbe» JShS uiymdastyrýymen ótti. Stýdentter erte júktilik, jastar arasyndaǵy qylmys, shylym shegýdiń ziiany men uialy bailanystyń áseri týraly jan-jaqty suraq qoidy.
«Jyl ótken saiyn kámeletke tolmaǵandar arasyndaǵy erte júktilik azaiyp keledi. Bul - qýantarlyq jaǵdai. Degenmen problema sol kúii qalyp otyr. Máselen, Estoniiada mundai derek múlde tirkelmeidi. Jastar, jasóspirimder dárigerge qaralyp, keńes alýdan qoryqpaýy tiis. Biz muǵalim emespiz, eshkimge jekip, uryspaimyz. Oblysta sanaýly ǵana maman bolǵan soń barlyq jasóspirimdi baqylap, qamti almaimyz. Sondyqtan kez kelgen ýaqytta dárigerdiń esigi ashyq, bári tegin. Oblys boiynsha kámeletke tolmaǵan 70-ten astam qyz júkti bolyp qaldy», - dedi balalar men jasóspirimder ginekology Saltanat Tobylbaeva.
Kezdesý kezinde turmystyq zorlyq-zombylyq týraly da aityldy. Oblysta ótken toǵyz ai ishinde 2993 turmystyq zorlyq-zombylyq tirkeldi.
«9 aidyń qorytyndysy boiynsha 2993 turmystyq zorlyq-zombylyq deregi tirkeldi. Ótken jyly dál osy kezde 2626 oqiǵa bolǵan. Iaǵni, ósim bar. Áielderdi uryp-soǵý boiynsha 502, áielderge qatysty jasalǵan 259 qylmys tirkeldi», - dedi Aqtóbe oblystyq politsiia departamenti Áielderdiń quqyǵyn qorǵaý jónindegi inspektor Aqgúl Esenǵalieva.
