Biyl oblys diqandary rekordtyq ónimge qol jetkizýi múmkin. Egin orý naýqanynyń alǵashqy nátijeleri de belgili. Naqty sanǵa júginsek, million tonnadan astam astyq qambaǵa túsken. Áli kúnbaǵys alqaptary orylmaǵanyn eskersek, bul kórsetkish ulǵaia túsetini anyq.
Jalpy, aimaq boiynsha biyl 1,1 mln gektar jerge dán sebilgen bolatyn. Onyń 573,6 myń gektaryna dándi daqyldar sebilse, 413,9 myń gektaryna maily daqyldar egilgen. Sondai-aq, 21,1 myń gektarǵa kartop, 8,5 myń gektarǵa kókónis, 4,8 myń gektarǵa baqsha daqyldary, 78,1 myń gektarǵa jemshóp sebildi.
Dándi daqyldardyń alqaby barlyq aýdandarda tolyq orylyp bitti. 14-qarasha kúngi sońǵy málimetterge sensek, dándi alqaptyń ár gektarynan 18 tsentner ónim túsken. Ótken jyly bul kórsetkish 11,3 tsentner bolǵanyn aitý kerek. Osynyń arqasynda tek dándi daqyldyń ǵana jalpy ónim mólsheri 1,029 tonnany qurap otyr. 2015 jyly bul kórsetkish 697,3 myń tonna bolǵan.
Maily daqyldar sebilgen alqaptyń ázirge 33,2 paiyzy, iaǵni, 137,3 myń gektary orylǵan. Mundaǵy ónimdilik mólsheri gektaryna 12,6 tsentnerden keledi. Ótken jyly maily daqyldardyń túsimi toǵyz tsentnerden asyp jyǵylǵan bolatyn. Ázirge qambaǵa 173,5 myń tonna maily daqyl tústi. Oblystyq aýyl sharýashylyǵy basqarmasynyń basshysy Qonysbai Tóleýbekovtiń aitýynsha, qarashanyń basyna qarai maily daqyldar da túgel qambaǵa túsýi tiis.
Óńir aýmaǵyndaǵy kartop alqaptarynyń 99,8 paiyzynda qazý jumystary aiaqtalǵan. Orta eseppen ár gektardan 199,2 tsentner ónim túsken. Bul byltyrǵy kórsetkishten týra 11 tsentnerge kóp. Q.Tóleýbekov jinalǵan 420,5 myń tonna kartop kelesi maýsymǵa deiin artyǵymen jetetinin aitady. Sondai-aq, 221,3 myń tonna kókónis alyndy. Bul gektarǵa shaqqanda 260,1 tsentnerden keledi. Baqsha daqyldarynyń biylǵy túsimi gektaryna 294 tsentnerden ainalǵan. Jinalǵan jalpy ónimniń mólsheri – 140,7 myń tonna.
Mundai rekordtyq kórsetkishtiń basty sebepkeri ylǵaldy jaz ekeni túsinikti. Áitkenmen, jazdyń jańbyrly bolýy jer emgen qaýymdy biraz áýrege de saldy. Bitik shyqqan astyqty shiritpei, shashaýsyz alý úshin diqandar jylt etken ashyq kúnniń bárin tiimdi paidalana bildi. Oraq naýqanyna oblys boiynsha alty myń traktor, eki myń destelegish, tórt myń júk kóligi, 3152 astyq kombainy jumyldyryldy.
Basqarma basshysy Q.Tóleýbekovtiń aitýynsha, sharýa qojalyqtarynyń jyl saiyn tehnikalaryn jańartyp kele jatqany da oraq naýqanynyń sátti aiaqtalýyna septigin tigizgen. Alqaptarǵa jiberilgen kombaindardyń 869-y ónimdiligi joǵary, jańa modeldi tehnikalar bolǵan. Olar barlyq dándi alqaptyń 40 paiyzyn igergen.
Osynshama tehnika úshin kúzgi maýsymǵa dep 27 myń tonna dizel otyny bólingen eken. Búginde sonyń 22,5 myń tonnasy jaǵylǵan.
- Osynsha astyqty jaýyn-shashynǵa ushyratpai, shashaýsyz keptirip alý úshin astyq keptirgish nysandarǵa bes myń tonna dizel otyny qosymsha bólinip otyr. Oblys aýmaǵynda astyq keptirýge arnalǵan 77 keshen bar. Solar turǵanda astyqty shyǵynǵa ushyratamyz-aý degen qorqynysh bolmaýy tiis. Keler jylǵa josparlanǵan tuqym mólsheri de 107 paiyzǵa oryndaldy, - deidi Qonysbai Tóleýbekov.
Jemshóp qory da qystamaǵa artyǵymen jeterlik mólsherde daiyndalypty. Basqarmanyń deregine súiensek, 2,2 mln. tonna shóp, 102,7 myń tonna pishendeme, 240,7 myń tonna súrlem, 109,9 myń tonna saban ázirlengen.
Esimjan Naqtybaiuly, "Didar" gazeti
