Toraiǵyrov ýniversitetinde «Qalmaqqyrǵan taýlaryndaǵy arheologiialyq-etnografiialyq zertteýler» atty halyqaralyq ǵylymi-tájiribelik konferentsiia ótti, dep habarlaidy pavlodarnews.kz.
Konferentsiianyń plenarlyq otyrysyna Pavlodar oblysynyń ákimi Bolat Baqaýov, belgili ǵalymdar, ziialy qaýym ókilderi, stýdentter men oqýshylar qatysty. Otyrystyń ashylýynda sóz alǵan aimaq basshysy Bolat Baqaýov konferentsiianyń óskeleń urpaqqa tarihi sanany sińirýdegi mańyzdylyǵyna toqtalyp ótti.
«Halqymyzdyń ejelden kele jatqan tarihy óskeleń urpaqqa zor taǵylym men ónege beredi. Ótkennen sabaq alý arqyly jarqyn bolashaqqa jol ashamyz. Keleshek urpaqtyń tárbiesinde Otanǵa, tarihqa degen qurmet mańyzdy oryn alady»,- dedi Bolat Baqaýov. Konferentsiiaǵa orai uiymdastyrylǵan kórmede ýniversitet ǵalymdary qurastyrǵan «Serektas shaiqasy» kitabynyń tanystyrylymy ótti. Jinaqta tarihshy, etnograf ǵalymdardyń «Qalmaqqyrǵan» tarihi shaiqasy týraly maqalalary toptastyrylǵan. Jinaq avtorlarynyń biri - E.Bekmahanov atyndaǵy tarih jáne etnografiia ortalyǵynyń direktory, filosofiia ǵylymdarynyń kandidaty, professor Amantai Qudabaev aldaǵy ýaqytta kitaptyń ekinshi tomy shyǵatynyn jetkizdi.
«Jinalǵan materialdyń 30 paiyzy ǵana osy jinaqqa endi. Kitap tórt bólimnen turady. Birinshi bólim «Qazynaly qazbalar» dep atalady. Munda arheologiialyq zertteýler toptastyrylǵan. Kelesi «Tarihtan tábárik», «Bahadúr babalar», «Ańyz ben aqiqat» bólimderinde qazaq-qalmaq shaiqastaryna bailanysty zertteýler, kónekóz qariialardyń estelikteri, ólketanýshylar men jýrnalist qaýymnyń maqalalary keltirilgen»,- deidi Amantai Qudabaev.
«Osy kitap arqyly biz «Qalmaqqyrǵan» tarihi oqiǵasynyń qashan, qai jerde bolǵandyǵyn dáleldep, oǵan qatysqan batyrlardyń esimderin jańǵyrttyq».
Konferentsiiada ál-Farabi atyndaǵy Qazaq Ulttyq ýniversitetiniń professory Irina Erofeeva, Resei Ǵylym akademiiasynyń ǵylymi qyzmetkeri Vladimir Tepkeev, tarihshy-ólketanýshy Dáýren Aiashinov, Á.Marǵulan atyndaǵy arheologiialyq ǵylymi-zertteý ortalyǵynyń direktory, dotsent Viktor Merts, E.Bekmahanov atyndaǵy tarih jáne etnografiia ortalyǵynyń direktory Amantai Qudabaev sóz sóilep, qazaq-qalmaq shaiqastarynyń tarih pen ǵylymda alatyn orny týraly baiandama jasady.
