Qazan aiynyń ishinde AQSh-tyń Soltústik Kaliforniia shtatynda 1000-ǵa jýyq jabaiy jylqy bir jerge aidalyp ákelinbek. Keiin olar satylymǵa shyǵarylyp nemese senimdi adamdarǵa beriledi. Sonymen birge, jergilikti sheneýnikter janýarlardyń qasaphanaǵa da jiberilýi múmkin ekenin joqqa shyǵarmaidy, dep habarlaidy QazAqparat mnn.com-ǵa silteme jasap.
Jabaiy jylqylar Oregon shtatynyń shekarasyna jaqyn ornalasqan Modok ulttyq parkiniń ústirtin mekendeidi. Kaliforniiadaǵy jabaiy jylqylardyń úiiri AQSh Federaldyq orman basqarmasynyń baqylaýynda bolyp otyr. Jylqylardy aidap áketý 9 qazanda bastalyp, bir aiǵa sozylady.
Aidalǵan 1000 janýardyń 700-ge jýyǵy býaz bieler nemese 10 jastan aspaǵan jas mal. Olar arnaiy mekemege aidalatyn bolady. 10 jastan asqan janýarlar ýaqytsha ustaý pýnktine jiberiledi. Olardyń bireýiniń baǵasy 125 AQSh dollary bolmaq. Bul baǵa 30 kún ózgermeidi, budan keiin 1 jylqynyń baǵasy 1 dollarǵa deiin túsedi.
Jabaiy jylqylar qasaphanalardan bólek rancho nemese basqa da jerlerge jiberilýi múmkin.
Federaldyq sheneýnikter jabaiy jylqylar mekendeitin aýmaq olar úshin tar bolyp jatqanyn aitýda.
«Bizdiń aýmaǵymyzda 206-dan 402-ge deiin janýar bolýy tiis, al bizde bolsa, 4000-ǵa jýyq jylqy jaiylyp júr», - dedi Modok ulttyq parkiniń bas ǵylymi jetekshisi Amanda MakAdams. Onyń aitýynsha, janýarlarǵa azyq pen sý jetispeidi.
Federaldyq sheneýnikter jylqylardyń neǵurlym kóp sanyn jaiǵastyrǵysy keletinin aitty. Biraq Federaldyq orman basqarmasynyń ókili Ken Sendýski úkimettiń «olardyń bárin jaiǵastyra almaitynyn» aitýda.
Jabaiy jylqylardy qorǵaý boiynsha amerikandyq naýqan ókilderi Federaldyq orman sharýashylyǵyna qalyptasqan jaǵdaida gýmanistik sheshim qabyldap, barlyq isti birtindep atqarýǵa shaqyrdy. Biraq Úkimettiń kózqarasy boiynsha, osyndai sharalar jaǵdaidy ózgerte almaidy.
«Jabaiy jylqylar popýliatsiiasynyń 20-25 paiyzǵa ósýi kezinde bul jerde tek biylǵy jyly 800-1000 jabaiy jylqy qulyndaǵan, sondyqtan birtindep jasalǵan qadamdar nátijesiz», - dep málim etti jergilikti bilik ókilderi.
