QR Ulttyq qaýipsizdik komitetiniń Youtube arnasynda jariialanǵan «Shyrmaýdaǵy gúlder» derekti filminde DAISh múshelerine aldanyp qalǵan almatylyq áieldiń ómiri baian etiledi, dep habarlaidy QazAqparat tilshisi.
Almatylyq Erkejan Ermekbaiqyzy 2016 jyly eki jasar balasyn jetektep, Túrkiia arqyly, Siriiaǵa ushyp ketken. Ol DAISh quramynda Idlib qalasynda bolǵan.
«DAISh adamdarynyń biri maǵan áleýmettik jeli arqyly shyǵyp, shynaiy musylman ekenine sendirdi. Qurannan, shariǵattan habary bar ekenin aityp, ózin tanystyrady. Sol tanystyq ári qarai jalǵasyp, olar maǵan «Siz qandai aqida ustanasyz?» dep surady. Sodan keiin musylman mindetin atqarýym kerektigin aityp, «dini bilimińiz bar ma?» dep surady. Eń aldymen otbasylyq qarym-qatynasymdy bilgisi keldi», - deidi ol.
Qazaqstannan barǵan áieldiń aitýynsha, DAISh músheleri aqyry ony Siriiaǵa kelýge kóndirgen.
«DAISh músheleri dini bilimimniń joqtyǵyn paidalanyp, tez aldanyp qalatynymdy baiqaǵan bolýy kerek. Ol jaqqa barsam, kádimgi úlken soǵys júrip jatyr eken. Islam dininde adamdy óltirmeidi, musylman adamdar bir-birine kómektesýi kerek. Soǵystyń oshaǵyna, ortasyna qalai barǵanyma sene almai qaldym. Birinshiden, olar jer-jerden musylmandardy áleýmettik jeli arqyly jinap alady. Basty qarýy – musylmannyń atyn jamylýynda. Olardy biz jihadqa daiyndaimyz dep úgitteidi. Men siiaqty qarapaiym musylmandar olardy kórmei-aq senip qalady. Siriiaǵa kelgen kezde qaida kelgenin bilmei qalady», - deidi ol.
26 jastaǵy áiel Siriiadaǵy jaǵdai tym aýyr ekenin, adamdar tamaq pen kiim tappai, ash-jalańash dalada qalyp jatqanyn aitady.
«Balammen barǵanda sýyq úide turdym. Tórt qabyrǵa ǵana. Balamdy nemen asyraimyn dep ýaiym jedim. Qatty ókinemin. Túsingen joqpyn. Ózimniń qalai qursaýǵa túsip qalǵanymdy baiqamai qaldym. Bári kesh boldy. Artqa qaitatyn jol joq dep oiladym. Men ólimnen qatty qoryqtym. Qandai ana bolsyn, balasyn oilaidy. Elbasy Nursultan Nazarbaevqa men siiaqty adasyp, aldanyp qalǵan azamattardy elge qaitarǵany úshin rahmet aitamyn. Men Qazaqstan Respýblikasynyń halqynan keshirim suraimyn. Qylmysymdy moiyndaimyn. Adasyp, aldanǵanymdy túsindim», - deidi ol.
