Búgin oblys ákimi Amandyq Batalovqa Taldyqorǵan qalasynyń kóliktik infraqurylymyn odan ári damytý, oblys ortalyǵyn gazdandyrý barysyn, sol siiaqty abattandyrý sharalary jaily josparlary tanystyryldy. Qala ákimi Baǵdat Qarasaev jobalarǵa oblys ákiminiń budan buryn bergen tapsyrmalaryna sáikes ózgerister engizilgenin aitty, dep habarlaidy "Ult aqparat" Almaty oblysy ákimdiginiń resmi saityna silteme jasap.
Taldyqorǵan qalasy ákiminiń orynbasary A. Tutybaevtyń aitýynsha, biylǵy jyly qalanyń kóliktik infraqurylymyn damytýǵa 2325,9 mln. teńge bólingen. 13 kóshede 23,4 shaqyrym jol salý josparlanǵan. Bul oraida qosalqy kóshelerdiń jóndeý jumystaryna kóp mán berilgen. Qurylys-jóndeý jumystarynyń jalpy kólemi paiyzǵa shaqqanda 22 %-y ortalyq kóshelerde, 78 % -y qosalqy kóshelerde júrgiziledi. Atap aitqanda, Ótenai, Erkin aýyldyq okrýgteriniń, Shyǵys jáne Ońtústik-Batys shaǵyn aýdandardyń kósheleri jóndeledi. Sonymen qatar baiandamashy 9 shaǵyn aýdandaǵy turǵyn úi massivterine kiretin 44 podezdik jol jasalatynyna toqtaldy. Sondai-aq qalada kólik qoiatyn 5 ornyn belgilenedi.
Oblys ákimi Amandyq Batalov baiandamashynyń sózin muqiiat tyńdaǵan soń qai kósheler kúrdeli jóndeýdi, qai kósheler ortasha jóndeýdi qajet etetinin aita otyryp, jobaǵa birqatar túzetýler engizdi.
- Abai, Aqyn Sara, Abylai han, Aldabergenov, Slanov, Eskeldi bi, Qabanbai batyr kóshelerine kúrdeli jóndeý júrgizý qajet. Barlyq jumys sapaly júrgizilýi kerek. Gaz jelisi tartylyp jatqan jáne tartý josparlanyp otyrǵan kóshelerdiń ázirge tek shuńqyrlaryn ǵana bekitip, jóndeńizder. Kúrdeli jóndeýdi tek gazdandyrý isi aiaqtalǵan soń jasaisyzdar. Kúrdeli jóndeý jasap ap, gaz júrgizetin kezde qaita qazyp júrmeńizder. Bul biýdjettiń aqshasy, sondyqtan asa yjdahattyqpen jumys isteńizder, - dedi A. Batalov.
Gazdandyrý boiynsha Amandyq Batalov mamyr aiynda alǵashqy birneshe úi tabiǵi gazǵa qosylý kerektigin taǵy da atap aitty.
- Sizder qai úiler birinshi bolyp qosylatynyn qazirden bilýlerińiz kerek. Ol úshin jurtshylyqpen kezdesip, jiyn ótkizip, tarif týraly, qosylýdyń quny jaily áńgimelesý qajet. Aldaǵy gazdandyrý isi týraly turǵyndardyń barlyq suraqtaryna naqty ári tolyq jaýap berý úshin qoldaryńyzda barlyq esep-qisap, naqty aiqyn tsifrlar bolýy tiis, dedi A. Batalov.
Kezdesý barysynda qalany jáne basqa da mańyzdy nysandardy kórkeitý jobalary da tanystyryldy. Kireberistegi jańa arka, Etnoaýyl, kottedjdi qalashyq, Qaratal jaǵalaýyndaǵy jazǵy kafe jobalary kórsetildi.
Oblys ákimi kireberis arkanyń jobasyn túgeldei qaita aýystyrý qajettigin aitty. Etnoaýylǵa da kreativti oilar qosý kerek. Al kottedjdi qalashyqtyń qurylysy úshin zamanaýi úlgidegi bir qabatty úilerdiń birneshe nusqasy tańdalyp alyndy.
- Kez kelgen qurylysty júrgizgende, kez kelgen jobany daiyndaý barysynda eń aldymen sáýlet-qurylys talaptaryna súienińizder. Egjei-tegjeili jospardy umytýǵa bolmaidy. Qurylys syzyǵy, qyzyl syzyq – munyń bári jai ǵana terminder emes, qurylystyń durys, sapaly jáne úilesimdi salynýynyń negizi, - dep sózin qorytyndylady A. Batalov.
