Qalamqas kenishindegi oqiǵadan keiin tótenshe jaǵdailardy aldyn alý úshin jan-jaqty tehnikalyq saraptama júrgiziletin bolady, dep habarlaidy "Ult aqparat" Energetika ministrliginiń baspasóz qyzmetine silteme jasap.
Búgin Mańǵystaý oblysynyń óńirlik kommýnikatsiialar qyzmetinde BAQ ókilderi úshin brifing ótti. Brifing barysynda «Qalamqas» ken ornynda bolǵan tehnogendik apatqa qatysty máseleler talqylandy.
Jaqyp Marabaev, «Mańǵystaýmunaigaz» AQ bas direktorynyń birinshi orynbasary Baqyt Imanbaev, «QazMunaiGaz» óndirý jáne burǵylaý tehnologiialary ǵylymi-zerttý institýty» JShS Bas direktory Baqytjan Hasanov, «Munai-gaz ǴJZI» AQ bas direktory Oleg Gershtanskii qatysty.
«QazMunaiGaz» UK AQ basqarma tóraǵasynyń óndiris jónindegi orynbasary Jaqyp Marabaevtyń aitýynsha, osy jyldyń 13 naýryzynda «Mańǵystaýmunaigaz» AQ-ǵa qarasty Qalamqas ken ornynyń kúrdeli ýchaskesinde uńǵymanyń qurylysy barysynda tehnogendik sipattaǵy gaz-sý aralas tabiǵi burqaq shyqqan. Onyń aitýynsha, naýryzdyń 13-24 kúnderi mamandar uńǵymany kúrdelendirilgen burǵylaý eritindisimen jýý, sondai-aq grifondardy joiý úshin jóndeý-oqshaýlaý jumystaryn júrgizgen. Qoldanǵan sharalarǵa qaramastan, 25 naýryz kúni jer betine shyqqan gaz-sý qospasynyń oshaǵy jana bastaidy. Mańǵystaý oblysy boiynsha TJD bastyǵy Q.B. Bazarbaevtyń basshylyǵymen TJ, ekologiia, politsiia, ortalyq memlekettik organdar, QMG, «Mańǵystaýmunaigaz» AQ, «SiBÝ» JShS jáne Mańǵystaý oblysy ákimdigi ókilderinen qurylǵan jedel shtab órt oshaǵyn aýyzdyqtaý boiynsha qajetti sharalardy qabyldaǵan. Tótenshe jaǵdaidy joiý úshin 80-nen astam maman jáne 25 túrli tehnika jumyldyrylǵan.
Jaqyp Marabaevtyń aitýynsha, qaraǵanda, 28 naýryzda saǵat 01.05-te №8237 uńǵymasy mańaiyndaǵy grifonda shyqqan órt aýyzdyqtalǵan. Qazirgi tańda gaz-sý aralas tabiǵi burqaqtyń jer betine shyǵýy toqtatylyp, paida bolǵan grifondardyń jabylǵany belgili bolyp otyr. Zardap shekkender men qaza bolǵandar joq. Aldyn ala málimetter boiynsha, materialdyq shyǵynnyń kólemi shamaly.
«Árine, biz qashanda osyndai oqiǵalarǵa daiyn bolýymyz kerek - bul úshin osy siiaqty qaýip-qaterler týyndaǵan kezde ýaqtyly jáne sapaly áreket etý boiynsha arnaiy reglamentter ázirlengen. Mundai jumystarǵa biliktiligi asa joǵary, óndiristi jete biletin jáne mol tájiribesi bar munaishy-mamandar qajet ekenin basa aitqym keledi. 8237 uńǵymadaǵy órtti aýyzdyqtaý úshin eńbek etken barlyq áriptesterime alǵys bildiremin. Olardyń otbasy múshelerine aitarym - endi qaýip joq, ýaiymdamańyzdar», - deidi Jaqyp Marabaev.
Qazirgi kezde nysanda qaita qalpyna keltirý boiynsha keshendi jumystar júrgizilýde. Mamandar aldaǵy ýaqytta osyndai tótenshe jaǵdailardyń aldyn alý úshin jan-jaqty tehnikalyq saraptamalar júrgiziletin bolady. Saraptamalardyń nátijesi boiynsha, Qalamqas ken ornynyń ortalyq bóligindegi uńǵymalardy jobalaý kezinde burǵylaý uńǵymalarynda júrgiziletin jumystardyń qaýipsizdigin jáne sapasyn qamtamasyz etý úshin arnaiy túzetý sharalary qabyldanatyn bolady.
Aita keteiik, 13 naýryzda Mańǵystaý aýdanyndaǵy «MańǵystaýMunaiGaz» AQ-nyń «Qalamqas» munai-gaz ken ornynda «Si Bý» injenerlik burǵylaý kompaniiasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dispetcherlik qyzmetine «Qalamqas» ken ornyndaǵy uńǵymadan shyqqan gaz janyp, biikti 10 metrge deiin jalyn atqylap turǵandyǵy habarlandy.
Al keshe QR Energetika ministrligi ken ornyndaǵy órttiń tolyǵymen sóndirilgenin málimdegen bolatyn.
