Ataǵy alty qyrdan asyp, ejelden-aq el aýzynda júrgen áigili «Qalamqas» án-bi ansambli óz ónerin Kúrshim jurtynyń talqysyna salyp qaitty.
«Abai aýdanynyń ónerpazdary kontsert ákeledi eken» degen habar dúńk ete túskende Kúrshimniń án-jyr dese ishken asyn jerge qoiatyn ónersúier qaýymy shynymen-aq eleńdegen edi. Bul sóz rasqa shyǵyp, 20 qyrkúiek kúni aýdandyq mádeniet úiin betke alǵan jurttyń qarasy shynynda da moldaý bolǵan-dy. Asyǵa kútken kontserttiń kórermendi á degennen-aq baýrap áketkeni shyndyq.
Aldymen shyǵyp, «Altyn adam» biin bilegen bir top ónerpazdyń qimyl-qozǵalysy, olardy súiemeldegen mýzyka áýeniniń ózgeshe saryny sahnaǵa kóz tikken qaýymdy tylsym bir álemge jetelep ketkendei edi. Sol saryn kilt tynǵanda demin ishine tarta tyńdaǵan jurt «ýh» dep demderin bir-aq aldy. Ile-shala shyǵyp, Abaidyń «Segiz aiaq» ánin áýeletken Qairat Qabyshevtyń óneri de joǵary baǵalandy. Budan soń kezek alǵan birinen-biri ótken nebir maitalman ánshiler men tal-shybyqtai maiysqan bishiler kórermen kóziniń jaýyn alyp, qulaǵynyń quryshyn qandyrdy.
Qysqasy, abailyqtardyń osy kúngi tamasha óneri kúrshimdik talǵampaz qaýymnyń kóńilinen shyqty. Bas-basyna toqtalyp, oqyrmandy mezi qylmai-aq qoiaiyq, degenmen, aitpai ketýge bolmaityn keibir jailardy jiliktep shyqsaq, biraz nárseniń basy aiqyndalyp qalary sózsiz. Zaldaǵy qaýymǵa ásirese unaǵany – bes adamnan quralǵan kóne ult aspaptary ansambliniń óneri boldy desek, muny eshkim teriske shyǵara qoimas. Sonymen qatar, sahna mádenietiniń qapysyz saqtalýy da kóńil qoiǵan adamdy shynymen súiindirgeni sózsiz. Al osy ujymnyń ardageri, Qazaqstan Respýblikasynyń eńbek sińirgen qairatkeri, ansambldi birge quryp, bite qainasyp kele jatqan Abai aýdanynyń Qurmetti azamaty, jeztańdai ánshi Baqyt Shaǵataeva shyrqaǵan L.Hamididiń áigili «Bulbul» ánine qulaq túrgen jurttyń tańdanysynda shek bolǵan joq. Zeinetke shyqqanyna da birqaýym ýaqyt bolyp qalǵan, baiaǵyda «áje» atanǵan baiyrǵy ónerpazdyń daýys yrǵaǵy, syńǵyrlaǵan úniniń tazalyǵy osy salanyń kánigi mamandaryn da tánti etti.
- «Qalamqas» ansambliniń qurylǵanyna kelesi jyly 45 jyl tolady, - dep syr bólisti bizben osy ujymdy bastap kelgenderdiń biri, Abai aýdandyq mádeniet úiiniń direktory Sailaý Nurpeiisov. – Óner bolǵan soń ony taratý kerek, el-jurtqa kórsetý kerek. Sol maqsatpen biz ótken jyly Zaisan, Tarbaǵatai aýdandaryna, Katonqaraǵaiǵa arnaiy baryp, kontsert qoiyp qaittyq. Sodan soń aty talai jerge máshhúr, dańqy dúrildep turǵan Kúrshimge, qazaqtyń áigili uldary Doshan men Ýáiistiń, Shákárim atamyzdy kúlli qazaqqa nasihattaǵan belgili ánshi, Abai aýdanynyń Qurmetti azamaty Ólmesekov Keldenbaidyń eline ádeiilep at basyn tiregendi jón kórdik. Qyryq eki adamnan turatyn osy óner ujymyn aýdan ákiminiń orynbasary Baýyrjan Táttibekov bastap, biz qostap, alyp kelgen edik. Bul saparymyzǵa rizamyz, Kúrshimniń kózi qaraqty qaýymy óte jaqsy qarsy alyp, laiyqty qoshemet kórsetti. Alla qossa, keleshekte jańa baǵdarlamamen taǵy da kele jatarmyz degen oiymyz bar.
Jaýapty qyzmetkerdiń bul sózderi tyńdaǵan jurttyń razylyǵyn týǵyzyp, kóptiń sanasyna «uzamai taǵy da jolyǵarmyz» degen senim ornatqany daýsyz. Qyzyqty kesh máresine jetkende arnaiy kelip, óner salasynda tájiribe almasyp jatqan kúlli qazaqqa áigili, kóptegen shetelderge tanymal júldeli de irgeli óner ujymyna oń pikirlerin, aq tilekterin arnap, úidi-úiine taraǵan úlkendi-kishili kúrshimdikterdiń kókeilerinde kúi kúmbirlep, án jańǵyryp bara jatqany shyndyq edi.
Hasen Zákáriia
Kúrshim aýdany.
