«Qalamqas» ken ornyndaǵy apatty tergep-tekserý jumystary aiaqtaldy. Bul týraly elordada ótken baspasóz máslihatynda QR IIDM Indýstriialyq damý jáne ónerkásiptik qaýipsizdik komiteti tóraǵasynyń orynbasary Nyǵmetjan Maqajanov málim etti, dep habarlaidy QazAqparat tilshisi.
«QR Indýstriia jáne infraqurylymdyq damý ministrligi 2019 jylǵy 13 naýryzdaǵy Mańǵystaý oblysy «Qalamqas» ken ornyndaǵy №8237 uńǵymasynda oryn alǵan avariianyń tergep-tekserý jumystaryn aiaqtady. Usynylǵan materialdardy qarastyryp, «Si Bý» Injenerlik Burǵylaý Kompaniiasy» JShS uńǵymany burǵylaý kezinde ónerkásiptik qaýipsizdik talaptaryn buzǵandyǵy, bul óz kezeginde gaz jáne sýdyń shyǵýyna alyp kelgenin komissiia anyqtady», - dedi komitet ókili.
Belgili bolǵandai, merdiger uiym «Si Bý» Injenerlik Burǵylaý Kompaniiasy» JShS-niń uńǵymany salýǵa arnalǵan tehnikalyq jobany, munai jáne gaz uńǵymalaryn bekitý jónindegi ádistemelik nusqaýlardyń talaptaryn buza otyryp, tsementtiń qataiýyn kútýdiń belgilengen ýaqytyn eseptemegen, uńǵymanyń saǵasy ýaqytynan buryn germetizatsiialanǵan. Buǵan qosa, atqylamaǵa qarsy jabdyqtyń (AQJ) paidalanýǵa qatysty ónerkásiptik qaýipsizdik salasyndaǵy normativti-quqyqtyq akt talaptaryn saqtamaǵan.
«Si Bý» Injenerlik Burǵylaý Kompaniiasy» tarapynan osy uńǵymanyń qurylysyn qaýipsiz júrgizýge qajet bolǵan óndiristik baqylaýdy qamtamasyz etilmegen, sondai-aq kompaniia qyzmetkerleriniń ónerkásiptik qaýipsizdik salasyndaǵy bilim dárejesi sáikes kelmeidi», - dep naqtylady N. Maqajanov.
Osy oraida ol Komissiiamen apatty tergep-tekserý sheshimi boiynsha «Si Bý» Injenerlik Burǵylaý Kompaniiasy» JShS aiybynyń anyqtalǵandyǵyn atap ótti. Avariianyń sebepteri men mán-jailary kórsetilgen akt jasalyp jáne osyndai apattardyń aldyn alý boiynsha sharalar ázirlendi. Tergep-tekserý materialdary quqyq qorǵaý organdaryna berilgen.
«Tergeý qorytyndysy boiynsha komissiia birqatar sharalardy qabyldady. Osy oraida mundai apattarǵa jol bermes úshin tiisti sharalardy iske asyrýǵa nusqaý berildi. Atap aitqanda, «Qalamqas» ken ornyndaǵy №8237 uńǵymasynan 1 shaqyrym radiýsta barlyq uńǵymalarǵa monitoring júrgizý usynysy jasaldy. Iaǵni ekologiialyq zertteý júrgiziledi jáne basqa da uńǵymalarda osyndai apatqa jol bermes úshin tiisti sharalar atqarylady», - dedi N. Maqajanov elordada ótken baspasóz máslihatynda.
Esterińizge sala keteiik, Qalamqas munai ken ornynda uńǵymadan shyqqan gazdyń janýyna bailanysty jedel shtab quryldy.
QR Prezidenti Qasym-Jomart Toqaev ken ornyndaǵy jaǵdaidy óz baqylaýyna alǵan bolatyn. Sonymen qatar, naýryz aiynyń sońyna qarai Energetika ministrligi «Qalamqas» ken ornyndaǵy órt oshaǵy sóndirilgenin málim etti.
