Almaty ákimi Baqytjan Saǵyntaev keshe ótken qala aktiviniń otyrysynda Memleket basshysynyń Joldaýyn iske asyrý máseleleri boiynsha epidemiologiialyq ahýaldy turaqtandyrý jáne qalanyń densaýlyq saqtaý júiesin damytý sharalary týraly aitty, dep habarlaidy QazAqparat.
Qasym -Jomart Toqaev halyqqa Joldaýynda koronavirýs pandemiiasymen kúresý, eń aldymen halyqty vaktsinalaý jáne profilaktikalyq ekpeniń Ulttyq kúntizbesin oryndaý mindetterin qoidy.
Almatyda 200-ge jýyq ekpe pýnkti jumys isteidi. Vaktsinanyń birinshi komponentin 875 myń adam, ekinshisin 748 myń almatylyq saldyrdy.
Vaktsinalardyń úzdiksiz jetkizilýi qamtamasyz etildi. Qalaǵa barlyǵy 992 myń doza jetkizildi.
«Qabyldanǵan sharalardyń nátijesinde Almatyda sanitarlyq-epidemiologiialyq ahýal turaqtana bastady. Dert deńgeiiniń tendentsiiasy tómendep keledi. Búginde biz almatylyqtardyń táýliktik juqtyrý deńgeiiniń ótken aptalarmen salystyrǵanda 300 adamǵa azaiǵanyn baiqadyq», - dedi Baqytjan Saǵyntaev.
Sonymen qatar, ol jedel járdemge qońyraý shalý sany 4 myńnan 2,4 myńǵa deiin azaiǵanyn aitty. Naýqastardy aýrýhanaǵa jatqyzý kórsetkishi de eki ese tómendedi.
«Degenmen, aýyr zardaptar men ólimge ákeletin jańa indetter qaýpi áli de bar. Sondyqtan infektsiianyń aldyn alý, epidemiologiialyq zertteýler júrgizý, juqtyrýdyń jappai tizbegin boldyrmaý strategiialyq mindet bolyp qala beredi», - dep atap ótti Almaty ákimi.
Ol meditsinalyq qyzmetterdiń barlyq spektrindegi sapaly qyzmettiń mańyzyn qadap turyp aitty. Ambýlatoriialyq-emhanalyq kómek júiesi skriningtik jáne profilaktikalyq tekserýlerdi jalǵastyrýy tiis.
Sonymen qatar, ol qalanyń densaýlyq saqtaý júiesiniń infraqurylymyn jaqsartý jumystary jalǵasa beretinin aitty. Sońǵy eki jylda, pandemiiaǵa qaramastan, eki modýldik aýrýhana men 1080 tósek oryndy infektsiialyq aýrýhananyń filialy salyndy. Qaladaǵy 18 iri aýrýhanada ottegi stantsiialary ornatyldy. Kárizdik aǵyndar men meditsinalyq qaldyqtardy zalalsyzdandyrý júieleri jańardy.
Qazirgi ýaqytta ana men balanyń densaýlyǵyn qorǵaý úshin tiptik qabyldaý bólimi jáne taza bólmeler kesheni ári zamanaýi operatsiialyq blogy, reanimatsiia bólimi bar qurylys jobasy ázirlenip jatyr. Sondai-aq, jańa dárigerlik ambýlatoriialyq-emhanalyq mekemeler salý josparda.
«Ákimdikke qarasty qalanyń meditsinalyq uiymdarynda 19 myńnan astam meditsina qyzmetkeri jumys isteidi. Kadr tapshylyǵyn azaitý úshin jol kartasy júzege asyrylýda, 120 rezidentti óte tapshy meditsinalyq mamandyqtar boiynsha oqytý úshin jergilikti biýdjetten qarjy bólindi», - dedi Baqytjan Saǵyntaev.
