Parlament Senatynyń jalpy otyrysynda «Qazaqstan Respýblikasynyń ákimshilik-aýmaqtyq qurylysy týraly» Qazaqstan Respýblikasynyń Zańyna ózgerister men tolyqtyrýlar engizý týraly» Zańy qabyldandy, dep habarlaidy "Ult aqparat".
Zań jobasy birqatar Parlament depýtattary bastamashylyǵymen ázirlengen.
«Atalǵan zań jobasy Qazaqstan Respýblikasynyń ákimshilik-aýmaqtyq qurylymy salasyndaǵy zańnamany jetildirýdi kózdeidi jáne elimizdiń ákimshilik-aýmaqtyq birlikteriniń, onyń ishinde aýdandyq mańyzy bar qalalardyń aǵymdaǵy mártebesin tolyq kólemde qamtýǵa baǵyttalǵan.
Qoldanystaǵy «Qazaqstan Respýblikasynyń ákimshilik-aýmaqtyq qurylysy týraly» Zańyna sáikes aýdandyq mańyzy bar qalalarǵa halyq sany 10 myń adamnan kem emes eldi mekender jatady. Qazirgi ýaqytta 48 aýdandyq mańyzy bar qalanyń 13-i halyqtyń sany boiynsha qala mártebesine sáikes kelmeidi, iaǵni osy aýdandyq mańyzy bar qalalarda turǵyndar sanynyń azdyǵyna bailanysty olardyń mártebesin ózgertý qajettigi týyndady. Alaida qoldanystaǵy zańnamada aýdandyq mańyzy bar qalanyń mártebesin aýyl sanatyna ózgertý jóninde norma qarastyrylmaǵan», - dedi senator Nurlan Beknazarov.
Osyǵan bailanysty osy zań jobasynda aýdandyq mańyzy bar qalalardy ózge eldi mekenderge qaita qurý jónindegi quzyretti aiqyndaityn túzetýler engizilip otyr. Engizilgen túzetýdiń utymdy tustarynyń biri – qala mártebesinen aýyldyq eldi mekenge ózgergen jaǵdaida sonda turatyn azamattar aýyl turǵyndary úshin zańdarmen qarastyrylǵan memlekettik áleýmettik qoldaýlarǵa qol jetkizedi. Mysaly, densaýlyq saqtaý, bilim berý, sport, mádeniet, áleýmettik qamsyzdandyrý salalarynyń qyzmetkerleriniń jalaqysyna jergilikti ókildi organdardyń sheshimderi boiynsha 25 paiyzdan kem emes ústemaqy qosylady.
«Oǵan qosymsha turǵyndar kommýnaldyq tólemderge, qyzmettik turǵyn úige, «Diplommen aýylǵa» baǵdarlamasy boiynsha, «Eńbek» baǵdarlamasy boiynsha kásiptik bilim alý men aýyldyq jerde kásipkerlikti qoldaýǵa, damytýǵa qatysty birqatar jeńildikterdi paidalana alatyn bolady», - dedi depýtat.
Sondai-aq, zań jobasynda halyqty jumyspen qamtýdaǵy ólshemsharttardyń eskirýi men ýaqyt talabyna sai bolmaýyna bailanysty «aýdandyq mańyzy bar qala», «kent» jáne «aýyl» uǵymdarynan qosymsha ólshemsharttardy alyp tastaýdy kózdeitin túzetýler usynylady. Bul túzetýler redaktsiialyq sipattaǵy túzetýler jáne qalalar men aýyldardyń ómir tirshiligine áserin tigizbeidi.
