QR Premer-Ministriniń birinshi orynbasary Asqar Maminniń «Qorǵas – Shyǵys qaqpasy» arnaiy ekonomikalyq aimaǵyna kelgen issapary Altynkól halyqaralyq temir jol beketinen bastaý aldy. Laýazymdy tulǵany oblys ákimi Amandyq BATALOV jáne respýblikalyq, oblystyq deńgeidegi jaýapty tulǵalar qarsy alyp, birge júrdi. Úkimet basshysynyń birinshi orynbasaryna arnaiy ekonomikalyq aimaqta atqarylǵan jumystar tanystyryldy.
Aldymen Altynkól halyqaralyq temir jol beketiniń basshysy Jandos Untaqbaev beketten attandyrylatyn konteinerlik júk poiyzdarynyń baǵyttary men júk tasymaldaýdyń múmkindikteri jaily baiandady. Aitýynsha, bekettiń halyqaralyq júk tasymaldaý qýaty ótken jylmen salystyrǵanda jeti esege ulǵaiypty. Biyl ótken bes ai merziminde Altynkól beketinen konteinerlik júk tiegen 163 poiyz jóneltilgen. Bekettiń «Qurǵaq port» ailaǵynda táýligine Qytai jáne Eýropa, Orta Aziia memleketterinen kelgen jiyrma konteinerlik júk poiyzdary qabyldanyp, júkteri aýystyrylyp tielip, saparyn jalǵastyra alady.
Úkimet basshysynyń birinshi orynbasaryna budan keiin Qorǵas sý basseinindegi selden qorǵaý sharalary baiandaldy.
Taý basyndaǵy qalyń qar men máńgilik muzdaqtar erigen jaǵdaida «Qorǵas – Shyǵys qaqpasy» AEA men Panfilov aýdanynyń eldi mekenderine Qaqpan, Baskól jáne Úsh Qazan kólderi tóndiretin qaýipke qarsy atqarylyp jatqan sharalardy respýblikalyq selge qarsy qareket basqarmasynyń basshysy T. Baimoldaev tanystyrdy. «Apat aityp kelmeidi» demekshi, asaý Qorǵas ózeniniń jyl saiyn maýsym, shilde ailarynda kún qatty qyzǵanda bir tasityn ádeti bar. Sondyqtan Qorǵas aýylyndaǵy kedenniń jáne «Qorǵas shekara mańy halyqaralyq yntymaqtastyq ortalyǵyna» ótetin kópirlerdiń tasqyn sý keletin joǵarǵy jaǵy selge qarsy nyqtalǵan. Sonymen qosa taý kólderiniń tasýyna qarsy qareket jasaý maqsatynda Shuńqyrbulaq shatqalynda úlken sý tospasyn jasaý josparlanypty.
Úkimetten osy tospany salýǵa qarjy bólý máselesi aityldy. Bekettegi kórmede «Nurly jol» kedendik ótkelindegi Logistikalyq keshen qurylysy da tanystyryldy. Logistikalyq keshen tolyq iske qosylǵanda bir jumys kúninde 875 kólikke júk tielip jolǵa shyǵatyn bolady. Sonyń 60 paiyzy (525) qysqa merzimdi saqtaý ǵimaratynda qaita tielip, 350 kólik ashyq alańnan júk alýǵa beiimdelgen. Asqar Mamin «Qorǵas – Shyǵys qaqpasy» AEA-nyń monitorlyq basqarý ortalyǵyna kelip, onyń qyzmetimen tanysty. Ortalyq qyzmeti jaily AEA basshysynyń orynbasary H. Belmash baiandady. Bul ortalyqta arnaiy ekonomikalyq aimaqta atqarylyp jatqan barlyq jumys monitor arqyly basqarylyp, saraptalyp, kúndelikti saralanyp, tiisti oryndarǵa habarlamalar beriledi.
Nurkent qalashyǵyna kelgen Úkimet basshysynyń birinshi orynbasary osy qalashyq irgesinen salynatyn Nurkent qalasyna bólingen jer telimine baryp, onyń bas jobasymen tanysty.
Bas joba jaiynda «Ýrbastil» JShS basshysy Liýbov Nysanbaeva baiandady. Bolashaqta 100 myńnan asa adam qonystanatyn jańa qalany salýǵa 600 gektardan astam jer bólingenimen onyń jalpy uzyndyǵy 14 shaqyrymǵa sozylyp, qalamen Qurǵaq port, Logistikalyq jáne Indýstriialyq ortalyqtar irgelespek. Jańa qalanyń alǵashqy belgisin (kapsýlasyn) arnaiy jasalǵan eńseli monýmentke Elbasy Nursultan Nazarbaevtyń ózi kelip qoiady dep kútilýde. Osy monýment ornatylatyn oryn belgilendi.
AEA aýmaǵyndaǵy «Qorǵas» shekara mańy yntymaqtastyǵy ortalyǵynda QR Premer-Ministriniń birinshi orynbasary sońǵy ailarda boi kótergen jańa qurylys nysandarynda boldy. Arnaiy aimaqtaǵy qurylys qarqyny kún sanap údep, milliondaǵan jyl boiy myzǵymaǵan alyp qum jotalary zamanaýi tehnikalardyń tegeýirinimen tegistelip, Qorǵas ózeniniń jaǵalaýynda záýlim ǵimarattar boi kóterýde.
Panfilov aýdany.
Myrzaǵali NURSEIIT
