Karantin ýaqytynda qala ishinde adamdardyń ary-beri júrýine tyiym salynbaidy, qoǵamdyq kólikter júre beredi. Bul týraly Almaty qalasy ákiminiń orynbasary Erlan Qojaǵapanov 18 naýryz kúngi brifing kezinde aitty. Onyń aitýynsha, 22 naýryz túngi saǵat 00.00-de qala tolyq jabylady. Qalaǵa kirgisi kelgender nemese shyǵatyndar osy ýaqytqa deiin Almatyǵa kirip nemese qaladan shyǵyp úlgerýi tiis. Bul qalada jumys istep, qala aýmaǵynda turatyndarǵa da qatysty dedi ol.
Onyń aitýynsha, karantin kezinde jedel meditsinalyq járdem, qutqarý qyzmeti siiaqty qalanyń tirshiligi úshin mańyzdy kólikterdiń ótýine ǵana ruqsat beriledi. Olar qalaǵa kirer kezde tolyq dezinfektsiiadan ótedi.
«Barlyq aimaq turǵyndaryna, atap aitqanda Almaty oblysynyń turǵyndaryna qarata aitqym keledi. Olar 72 saǵat ishinde qaladan shyǵyp úilerine jetip alý kerek. Almaty turǵyndaryna tolyq oqshaýlanýǵa keńes beremin.
22 naýryzda barlyq blok post jabylady. Qala turǵyndaryna kólik keptelisi bolmas úshin óz qozǵalystaryn rettep alýdy usynamyz. Sonymen qatar jeńil kólikter men avtobýstardyń shyǵýyna tyiym salynady», - dedi ol.
Erlan Qojaǵapanovtyń aitýynsha, 22 naýryz túngi saǵat 00.00-den bastap temir jol, ishki áýe reisteri de tutas toqtaidy. Tek halyqaralyq reistermen ushatyn jolaýshylarǵa qandai da bir "artyqshylyq" berilýi múmkin.
Onyń aitýynsha, karantin ýaqytynda azyq-túlik satatyn saýda oryndary, saiabaqtar jumys istei beredi. Dámhana, meiramhanalardan tamaqty satyp alyp ketýge ǵana bolady.
Sońǵy resmi derek boiynsha, Qazaqstanda 35 adamnan koronavirýs tabylǵan. 17 naýqas - Almatyda, 18 adam Nur-Sultanda emdelip jatyr.
Prezident Qasym-Jomart Toqaev Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty Qazaqstannyń barlyq aýmaǵyna 2020 jyldyń 16 naýryz saǵat 8.00-den bastap, 2020 jyldyń 15 sáýir saǵat 7.00-ge deiin tótenshe jaǵdai engizgen.
19 naýryz túngi saǵat 00.00-den bastap Almaty men Nur-Sultanda karantin engiziledi.
