17 qarasha kúni Kairdegi Mysyr mádeniet isteri jónindegi joǵarǵy keńesinde qazirgi qazaq poeziiasy men prozasy antologiiasynyń orys tilindegi nusqasynyń tusaýkeseri ótti, dep habarlaidy "Ult aqparat".
«Qazaq ádebieti jinaǵynyń arab tiline aýdarmasy men basylymyn kórkem aýdarma salasyndaǵy tájiribeli mysyrlyq mamandardyń qatysýymen Mysyr mádeni isteri jónindegi ortalyǵy men «MediaHab» baspa úii oryndady. Antologiialar alǵysóziniń avtory – IýNESKO janyndaǵy ALECSO (Arab ligasy memleketterindegi ǵylym, bilim jáne mádeniet isterin úilestirý uiymy) uiymynyń bas direktory doktor Muhammed ýld Omar», - delingen taratylǵan málimette.
«MediaHab» baspasynan jaryq kórgen qazaq prozasy men poeziiasynyń jinaqtary Arab Ligasyna múshe 22 memlekettiń 4 myńǵa jýyq kitaphanasy, ýniversitetteri men ǵylymi ortalyqtaryna jetkiziledi. Bul – shamamen 500 million oqyrman aýditoriiasy.
Tanystyrylymǵa Mysyr Mádeniet isteri jónindegi Joǵary keńesiniń Bas hatshysy Hisham Azmi, ALECSO uiymynyń arab zertteýler institýtynyń direktory Ali Hafiian qatysty. Qazaqstan tarapynan sharaǵa QR Prezidentiniń kómekshisi Aida Balaeva, QR Mysyr Arab Respýblikasyndaǵy Tótenshe jáne ókiletti elshisi Arman Isaǵaliev, Qazaqstan Jazýshylar odaǵynyń tóraǵasy Ulyqbek Esdáýlet jáne Ulttyq aýdarma biýrosynyń atqarýshy direktory Raýan Kenjehanuly qatysty.
Eske salaiyq, zamanaýi qazaq ádebietiniń úzdik úlgilerin BUU 6 tiline aýdarý jobasy «Jahandaǵy zamanaýi qazaqstandyq mádeniet» jobasy aiasynda júzege asyrylýda. Sondai-aq Qazaqstan Respýblikasynyń Tuńǵysh Prezidenti – Elbasy N.Nazarbaevtyń bastamasymen qolǵa alynǵan «Rýhani jańǵyrý» baǵdarlamasynyń mańyzdy baǵyty bolyp tabylady. «Jahandaǵy zamanaýi qazaqstandyq mádeniet» jobasynyń mindeti – qazirgi zamanǵy Qazaqstannyń ádebiet, mýzyka, beineleý óneri, horeografiia, kino jáne teatr salalaryndaǵy mádeni qazynalaryn álem jurtshylyǵyna tanystyrý.
«Arab álemi men bizdiń halqymyzdy islam dini ǵana emes, san myń jyldyq basqa da jan-jaqty qatynastar bailanystyrady. Qazaq jerinde dúniege kelgen ál-Farabi men Sultan Beibarystyń esimderi sizderge ejelden tanys. Búgin osy tarihi tamyrlastyqty jańa beleske kóteretin múmkindik týýda. Sizder qazaq ádebieti arqyly bizdiń halqymyzdy tereńirek tani alasyzdar. Qazaqstannyń Tuńǵysh prezidenti Nursultan Nazarbaev mádenietimizdi jer júzine tanystyrý týraly jobany usynǵanda arab álemine de basa nazar aýdardy. Elbasynyń tapsyrmasymen, qazaq ádebietiniń tańdaýly týyndylary Birikken Ulttar Uiymynyń 6 tiline aýdarylyp, jaryqqa shyqty», – dedi kitaptardy tanystyrý saltanatynda Aida Balaeva.
«Jahandaǵy zamanaýi qazaqstandyq mádeniet» jobasy aiasynda qazirgi qazaq ádebietiniń qos antologiiasy aýdarylyp, jaryq kórdi. Olar – «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy». Ár antologiianyń kólemi – shamamen 500 bettei, árqaisysyna qazaqstandyq 30 avtordyń tańdamaly shyǵarmalary endi.
Kitaptardyń aǵylshyn tilindegi aýdarmasy biylǵy 25 qyrkúiek kúni Britaniiada, ispan tilindegi nusqasy 27 qyrkúiekte Ispaniiada, orys tilindegi antologiia 15 qazanda Reseide tanystyryldy.
