Memleket basshysy Qasym-Jomart Toqaev Qazaqstan halqyna Joldaýynda halyqqa kópirme sóz, bos ýáde emes, kózben kórip, qolmen ustaýǵa bolatyn oń ózgerister keregin aitty, dep habarlaidy QazAqparat.
«Qazirgi halyqaralyq ahýal qyrǵi-qabaq soǵystyń eń qiyn kezeńin eske túsiredi. Biraq, shegine jete býyrqanǵan, memleketter qatań sanktsiialarmen tiresken, jer júzine qandai kesiri tietini beimálim bolyp turǵan búgingi jaǵdaidy adamzat buryn-sońdy kórmegen teńdessiz qiyndyq deýge ábden bolady. Sondyqtan, biz úshin kózdegen maqsattan aýytqymaýdyń, elimizdiń tutastyǵyn, jalpyulttyq birligi men tilektestigin saqtaýdyń ómirlik mańyzy bar», - dedi Prezident.
Toqaev reforma jasap jatyrmyz degen ataq úshin ǵana reforma jasaýdyń qajeti joǵyn aitty.
«Men muny birneshe ret aittym. Biz bul ózgeristerdi jurtqa jaqsy kóriný úshin jasamaimyz. Qulaqqa jaǵymdy, biraq oryndalýy ekitalai, kúmándi kórsetkishterge aldanbaimyz. Qaǵaz betinde ǵana júzege asyrylǵan, biraq shyndyqqa esh janaspaityn jalǵan tabystarǵa masattanyp otyratyn zaman kelmeske ketti. Halyqqa kópirme sóz, bos ýáde emes, kózben kórip, qolmen ustaýǵa bolatyn oń ózgerister kerek.
Biz kez kelgen máseleni ashyq aityp, ony sheshýdiń ońtaily joldaryn birge izdeýimiz qajet. Ekonomikadaǵy, saiasattaǵy jasandy monopoliialardy túbirimen joiýǵa tiispiz. Onyń ornyna ashyq ári ádil báseke ornatý óte mańyzdy. Sebebi naǵyz báseke bolǵanda ǵana halyqtyń ál-aýqaty artyp, jaǵdaiy jaqsarady», - dedi Memleket basshysy.
