Áleýmettik jelide Sheshenstan basshysy Ramzan Qadyrovty "shaitan" dep atap, "bilik úshin óz ákesin satyp ketti" dep aiyptaǵan "Andrei Býshmelev" degen atpen tirkelgen bloger Sheshenstan basshysynan keshirim surap, akkaýntyn óshirip tastady. Bul týraly Kavkaz.Realii saity habarlady. Ol sonymen birge barlyq jastardy Qadyrovqa til tigizbeýge úndegen.
Saittyń jazýynsha, "Andrei Býshmelev" akkaýnty qazir jabyq bolǵanmen akkaýnt iesiniń keshirim suraǵan videosyn internetten tez tabýǵa bolady. Mysaly, atalǵan video Baza telegram-arnasynda jariialanǵan.
Videoda bloger "ash qarynǵa ishimdik iship alyp" Qadyrovqa til tigizgenin aitady. Biraq oǵan ne túrtki bolǵanyn túsindirmeidi. "Onyń bir sebepteri bar" dep kóptiń kózinshe ony aita almaitynyn jetkizedi.
Reseide buǵan deiin de osyǵan uqsas oqiǵalar bolǵan. Kavkaz.Realii saitynyń jazýynsha, Sheshenstan basshysyn aiyptaǵan málimdemelerdiń "jolyn kesýmen" respýblika aýmaǵynan tys jerde júrgen sheshen diasporasy ainalysady. Atap aitqanda, olardyń mindetine Ramzan Qadyrov pen onyń otbasy jaily aitylǵan pikirler men kommentariilerdi qadaǵalaý jáne avtorlaryn izdeý kiredi.
Jaqynda Ramzan Qadyrovtan Permde turatyn jasóspirim keshirim suraǵan. Ol internette video jariialap, Sheshenstan basshysyn "shaitan" dep ataǵan edi
