Sheshenstan basshysy Ýkrainada "júrip", general-leitenant shenin alǵan Ramzan Qadyrovty quttyqtamai, Ýkrainada áskeri qimyl bastalǵanda Reseiden ketip qalǵan telejúrgizýshi Ivan Ýrgantty "patriot" degeni úshin Pýtinniń baspasóz hatshysy Dmitrii Peskovty synady.
"Patriot bolý úshin Reseidi synap, shetelge ketip qalý kerek ekenin, onda da shý-shurqanmen ketý qajettigin, saiasi gradýs tómendegende túk bolmaǵandai qaita orala salýǵa bolatynyn bilmeppin", - degen Qadyrov "Peskovtyń shiki túsinigine birdeńe isteý kerek" dep toqtaǵan.
Buǵan deiin jýrnalister suraǵyna jaýap bergen Dmitrii Peskov "Resei áskeriniń Ýkrainadaǵy "áskeri operatsiiasyn" qoldamaityndar men Reseiden ketip qalǵandardyń bárin birdei "satqyn", "besinshi kolonna" deýge bolmaidy" degen edi.
"Telejúrgizýshi Ivan Ýrgantty jaqsy bilemin, óziniń kózqarasy bar shyǵar, biraq ol úlken patriot", – dedi Pýtinniń baspasóz hatshysy.
Peskovtyń oiynsha, soǵysqa qarsy shyqqandar arasynda "memleket jaýlary" da bar: "túsinbegeni, qoryqqany bylai tursyn, bilikti jamandap, áskerdegi batyrlarymyzǵa til tigizip jatqandar jetkilikti, mine memlekettiń osyndai jaýlarymen kúresý kerek " dedi ol.
Resei 24 aqpanda Ýkrainaǵa shabýyl bastaǵan kúni Ivan Ýrgant otbasymen bul elden Izrailge ketip qalǵan. Keter aldynda instagram paraqshasyna "Úrei men kúizelis. Soǵysqa jol joq" dep jazǵan. Ol júrgizetin "Vechernii Ýrgant" baǵdarlamasy Birinshi arnadan shyqpai qalǵan, biraq telearnanyń baspasóz qyzmeti shoýdyń jabylǵany týraly aqparatty rastaǵan joq. Keiinirek Ýrgant demalysqa ketkenin, Reseige qaita oralatynyn habarlady.
