Prezidenttik kadr rezervine kirgen jastar laýazymǵa taǵaiyndalmai turyp, arnaiy ázirlengen baǵdarlamamen bilimderin jetildiredi. Bul týraly búgin Aqordada Memleket basshysy Qasym-Jomart Toqaevtyń Prezidenttik kadr rezervine engen jastarmen kezdesýinde QR Memlekettik qyzmet isteri agenttiginiń tóraǵasy Anar Jaiylǵanova aitty, dep habarlaidy QazAqparat.
«Jumysymyz osymen bitpeidi. Biz jobany júzege asyrýdyń jańa kezeńine kóshemiz. Rezervtegiler jańa laýazymǵa taǵaiyndalǵanǵa deiin arnaiy ázirlegen baǵdarlamamen oqytqymyz keledi. Kýrstar sarapshy-qatysýshynyń usynymyn eskere otyryp, derbes bolýy yqtimal. Baǵdarlama rezervshiniń jaýapty memlekettik laýazymda jumys isteý úshin qajetti qosymsha bilim alýyna baǵyttalady», - dedi agenttik basshysy.
Onyń atap ótýinshe, prezidenttik rezerv jasaqtaý bastamasy elimizde de, sonymen qatar odan tysqary jerlerde qoǵam tarapynan keńinen qoldaý tapqan.
«Rezervshilerdiń málimdelgen sany da airyqsha tanymaldyqqa ie boldy. Bul rette, rezervtegilerdi dańqty 30 spartandyqpen jii salystyryp jatady. Dál osy rezervke kirý úshin úmitkerler arasynda básekelestik pen intellektýaldyq baqtalastyq boldy. Prezidenttik jastar kadr rezervi syndy shyńdy baǵyndyrǵan jastarymyz belgilengen biiktikti ustap turaryna senemin», - dedi Anar Jaiylǵanova.
