Senat tóraǵasy Máýlen Áshimbaev Parlamenttiń jer qatynastaryn damytý máseleleri boiynsha zańdy qabyldaýyna bailanysty pikir bildirdi, dep habarlaidy "Ult aqparat".
Engizilgen jańa normalarǵa sáikes aýylsharýashylyq jerlerin satýǵa moratorii 2026 jylǵy 31 jeltoqsanǵa deiin uzartyldy. Jalǵa alý tek Qazaqstan azamattary men sheteldik qatysýy joq zańdy tulǵalar úshin ǵana qoljetimdi bolyp qala beredi. Al, aýyl sharýashylyǵy jerlerin sýbarendaǵa berýge tyiym salynady. Bul zań Memleket basshysynyń tapsyrmalaryn oryndaý maqsatymen Jer reformasy jónindegi komissiia jumysynyń qorytyndysy boiynsha ázirlendi.
«Bul zańda jerdi qorǵaýǵa, ony utymdy jáne maqsatty paidalanýǵa arnalǵan jańa normalar qarastyrylǵan. Soǵan sáikes Qazaqstan azamattaryna aýyl sharýashylyǵy jerlerin jekemenshikke berý jóninde Jer kodeksindegi normalardyń qoldanylýyna moratorii uzartylady. Qujatqa jaiylymdyq jerlerdi paidalaný máselelerin retteitin, jer ýchaskeleri boiynsha aqparattyń qoljetimdiligi men ashyqtyǵyn qamtamasyz etetin jańa normalar da engizildi. Onyń bári elimizdiń ulttyq múddesine tolyǵymen sáikes keledi», – dedi Senat tóraǵasy.
Budan buryn habarlanǵandai, Parlament Senatynyń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine jer qatynastaryn damytý máseleleri boiynsha ózgerister men tolyqtyrýlar engizý týraly» Zańyn eki oqylymda qarap, qabyldady.
Eske salsaq, 2016 jyly Memleket basshysynyń Jarlyǵymen Jer kodeksiniń jekelegen baptarynyń qoldanysyna moratorii engizilgeni belgili. Bul moratorii 2021 jyly 31 jeltoqsanda aiaqtalady.
