Foto: thevoicemag.ru
Qys mezgilinde sán men jailylyqty qatar ustaý – naǵyz óner. Ásirese sońǵy jyldary sán áleminde erekshe tanymal bolǵan qabattap kiiný stili (mnogosloinost) kiim arqyly ózińniń talǵamyńdy kórsetý men sýyqtan qorǵanýdyń eń tiimdi tásiline ainaldy.
Bul stildiń basty ereksheligi – ártúrli faktýradaǵy, tústegi jáne uzyndyqtaǵy kiimderdi úilestire otyryp, biregei ári úilesimdi obraz jasaý. Degenmen qabat kóp bolǵan saiyn, úilestirý qiyndai túsetini ras. Sondyqtan bul baǵytta kiingende tek jylýlyq pen jailylyq emes, pishin, tús jáne proportsiianyń tepe-teńdigin saqtaý asa mańyzdy.
Qabattap kiinýdiń negizgi erejeleri
Qabat kóp bolǵan saiyn, silýettiń tepe-teńdigin saqtaý qajet. Ishki qabattar denege jaqyn, juqa materialdan bolsa, syrtqy qabattar keń ári jeńil pishinde bolǵany durys. Mysaly, jińishke golf ústine júndi sviter kiip, syrtynan uzyn palto jamylý — ári jyly, ári stildi kórinedi.
Foto: beautyplan.ru
Qabattap kiinýde kóp tús emes, tústerdiń úilesimdiligi qajet. Úsh negizgi reńkten aspaý — klassikalyq qaǵida. Beitarap tústerdiń arasyna bir aktsentti tús (mysaly, sharap reńki nemese záitún jasyly) qossańyz, obraz birden jandanady.
Sonymen qatar trikotaj, jún, zamsha, bylǵary siiaqty materialdardy aralastyrý kiimge tereńdik beredi. Biraq bárin bir obrazǵa syidyrý artyq. Eki túrli tekstýra jetkilikti: mysaly, jún sviter men bylǵary palto — minsiz jup.
Foto: burdastyle.ru
Qabattylyq sán úshin ǵana emes, jylýlyq úshin de qajet ekenin umytpaǵan jón. Kiim qozǵalysqa kedergi keltirmeitin, denege yńǵaily bolýy tiis. Ár qabattyń óz mindeti bar: biri jylýlyq beredi, biri pishin túzedi, al eń syrtqysy — jel men sýyqtan qorǵaidy.
Qabattylyq stilindegi jii kezdesetin qatelikter
Qabattap kiiný erkindikti talap etedi. Biraq dál osy erkindik keide stildik qatelikke uryndyrady.
Artyq kólem
Barlyǵyn oversize úlgide kiiý — sán emes. Úlken palto tańdasańyz, astyndaǵy kiim yqsham bolǵany durys. Áitpese obraz “aýyr” kórinedi.
Tústerdiń qaqtyǵysy
Qyzyl, kók, sary men kúlgindi qatar qoldaný kózge aýyr áser qaldyrady. Batyl bolý — jaqsy, biraq sán men haostyń arasy — bir-aq qadam.
Foto: yapokupayu.ru
Matalardyń sáikessizdigi
Sporttyq kúreshe ústine klassikalyq palto kiiý — stil emes, beibereket qabattaý. Matalar men baǵyttar (casual, classic, street) bir-birin tolyqtyrýy kerek.
Aksessýardyń umyt qalýy
Qabattylyq tek kiimde emes, bólshekte de. Belbeý, sharf nemese bas kiim obrazdy jinaqtap, proportsiiany aiqyndaidy. Kóp qabattyń arasynda bel syzyǵyn kórsetý — tepe-teńdik saqtaýdyń taptyrmas tásili.
Foto: star-tex.ru
Aita ketetin mańyzdy jaiyt, qabattap kiiný — jai ǵana trend emes, qazirgi sán mádenietiniń bir bóligi. Ol adamnyń talǵamyn, stilin jáne ómirge degen kózqarasyn aiqyn kórsetedi. Durys úilesimdi tapqan adam úshin bul stil — ári jyly, ári zamanaýi, ári ózindik ereksheligi bar obraz jasaýdyń eń tiimdi joly.
