Jusan Bank-ke memleketten berilgen qarjylai kómekti birtindep qaitarý máselesi qarastyrylyp jatyr. Májilis depýtattarynyń saýalyna joldaǵan jaýabynda QR Premer-Ministri Álihan Smaiylov osyndai málimet aitty, dep habarlaidy QazAqparat.
«Jusan Bank-tiń búkil mámilesinen memleketke kelgen shyǵyndy aitsaq, keiingi 5 jyldyń ishinde táýelsiz sarapshylardyń kómegimen «ATF Bank» AQ-nyń «First Heartland Jusan Bank» AQ-ny satyp alýy týraly mámile usynylǵan bolatyn. 2020 jyly bankter biriktirilip, táýelsiz baǵalaý qorytyndysy (Due Diligence) boiynsha «ATF Banktiń» shyǵyny 124 mlrd teńge dep belgilendi. Bul shyǵyn «ATF Banktiń» jeke qarajaty esebinen jabylǵan. Osy mámile aiasynda «ATF Bank» pen Jusan Bank-tiń buǵan deiin shyǵarǵan obligatsiialary merzimin uzartý jáne syiaqy mólsherlemesin 4%-dan 0,1%-ǵa deiin túsirý jolymen túrlendirilgen edi», - dep jazylǵan jaýapta.
Úkimet basshysynyń málimeti boiynsha, atalǵan sharanyń arqasynda Jusan Bank-tiń jeńildetilgen syiaqy men naryqtaǵy syiaqynyń aiyrmashylyǵy esebinen 126 mlrd teńge kóleminde qaryz qalyptasqan.
Ol aqshanyń bári «ATF Banktiń» shyǵynyn óteýge baǵyttalǵan.
«Sondai-aq, Jusan Bank aktsionerleri 97 mlrd teńge kóleminde qosymsha kapital quiǵan bolatyn. Búgingi tańda Jusan Bank kapitaly tolysyp, ótimdilik deńgeiin kórsetip otyr. Kapital qory - 311 mlrd teńge bolsa, ótimdilik kórsetkishi - 1,2 trln teńge. Kapital qory men ótimdilik deńgeiiniń jetkilikti ekenin eskerip, búgingi tańda Jusan Bank-ke memleketten berilgen kómekti birtindep qaitarý máselesi qarastyrylyp jatyr», - deidi Álihan Smaiylov.
