Izraildiń «Haaretts» gazeti óziniń The Marker qosymshasynda Qazaqstanǵa arnalǵan ekskliýzivti pýblikatsiia jariialady, dep habarlaidy QazAqparat.
Prezident Qasym-Jomart Toqaevtyń qyzmeti týraly aita kele jýrnalister, «Qazaqstandaǵy bir jyl buryn bolǵan biliktiń aýysýyn «memleket úshin tarihi sát» dep atap kórsetken. Olardyń paiymdaýynsha, «Q.Toqaev el qiyn sátterdi basynan keshirip jatqan kúrdeli kezeńde halyqtan bilikke mandat alyp, ótken bir jyl ishinde qoǵammen oń dialog ornatyp jáne «estitin memleket» qura otyryp, birqatar ózgeristerge qol jetkize alǵan».
Gazette el damýynyń ótkir máselelerin talqylaityn Ulttyq qoǵamdyq senim keńesiniń jumysy atalǵan.
Sondai-aq, jýrnalister eldegi mańyzdy reformalar men beibit jinalystar, sailaý jáne saiasi partiialar týraly qabyldanǵan zańdarǵa silteme jasai otyryp, Q.Toqaevtyń zań shyǵarýshylyq qyzmetin de tilge tiek etken.
Buǵan qosa, basylymda qazaqtyń uly aqyny Abaidyń 175 jyldyǵyna arnalǵan bólek bet qaptalǵan. «Haaretts» gazeti óz oqyrmandaryna Qazaqstannyń Izraildegi Elshiligimen aqynnyń «Qara sózderiniń» tuńǵysh ret ivrit tiline aýdarylǵany týraly málimdedi.
Gazet redaktory Ioel Tsafrirge bergen suhbatynda Elshi Satybaldy Burshaqov Qazaqstannyń ekonomikalyq jaǵdaiy men syrtqy saiasaty jáne ekijaqty qarym-qatynastardyń qazirgi jaǵdaiy men damý perspektivalary týraly áńgimelep berdi.
S. Burshaqov, koronovirýs pandemiiasy kezeńinde Qazaqstan men Izrail arasynda tyǵyz dialog qalyptasqanyn habarlady. Sáýir aiynda telefon arqyly sóilesken kezde Prezident Q.Toqaev pen Prezident R. Rivlin COVID-19 juqpaly aýrýynyń taralýyn boldyrmaýǵa qatysty pikir almasty. Sonymen qatar, túrli meditsinalyq mekemelerde qyzmet atqaratyn Qazaqstan men Izrail dárigerleriniń qatysýymen beinekonferentsiia formatynda birneshe mańyzdy meditsinalyq konsýltatsiialar ótkizildi.
Elshiniń aitýynsha, búginde qazaqstandyq «Kýsto Grýpp» halyqaralyq korporatsiiasy kóptegen álemdik naryqta tanymal, lak-boiaý jabyndary men qurylys qospalaryn óndirýmen ainalysatyn izraildik «Tambýr» kompaniiasynyń jalǵyz iesi bolyp tabylady.
Elshi gazet oqyrmandaryn Israir kompaniiasynyń Almaty men Tel-Aviv arasynda tikelei áýe qatynasyn ashýǵa nietti ekenin habardar etti. S.Burshaqov izraildikterdi Qazaqstannyń Sharyn kanony, Ile Alataý tabiǵi qoryǵy, Altynemel ulttyq parki, Býrabai jáne t. b. sol siiaqty tanymal kórikti jerlerine saiahat jasaýǵa shaqyrdy.
«Haaretts» gazeti júz jyl buryn qurylǵan, onyń kúndelikti jaryqqa shyǵatyn taralymy 70 myń danadan asady. Táýelsiz zertteýlerdiń nátijesi boiynsha gazet eldegi «eń yqpaldy BAQ baspasy» bolyp sanalady. «Haaretts» ivrit jáne aǵylshyn tilderinde shyǵarylady.
