Keshe, 1 shildede Qazaqstannyń Izraildegi Elshiligi Tel-Aviv meriiasynyń jáne «Kaztsink» korporatsiiasynyń qoldaýymen qalanyń eń tanymal týristik aimaqtarynyń biri – teńiz portynyń jaǵalaýynda ornalasqan saiabaqta Qazaq kiiz úiin tigip, kórme ashty, dep habarlaidy "Ult aqparat" Izraildegi QR Elshigine silteme jasap.
Ekspozitsiianyń ashylýy Qazaqstan Respýblikasy Táýelsizdiginiń 30 jyldyǵyna jáne Ulttyq Dombyra kúnine orailastyryldy.
Saltanatty sharaǵa Tel Aviv – Iaffo qalalyq keńesiniń músheleri, Ierýsalim Patriarhy III Teofil, Syrtqy ister ministrliginiń, diplomatiialyq korpýs, Izraildiń qoǵamdyq jáne isker toptarynyń, buqaralyq aqparat quraldarynyń ókilderi men qazaqstandyq diaspora qatysty.
Óz sózinde Qazaqstan Elshisi Satybaldy Burshaqov 2014 jyly kiiz úi men dombyra IýNESKO-nyń Adamzattyń materialdyq emes mádeni murasynyń kórneki tizimine engizilgenin, sondai-aq halqymyz úshin kieli kiiz úidiń qasieti men qasterli máni týraly egjei-tegjeili aityp berdi. Diplomat halqymyzdyń mádeni murasyn tanystyrý Qazaqstan men Izrail arasyndaǵy mádeni-gýmanitarlyq bailanystardy odan ári nyǵaitýǵa yqpal etetindigin atap ótti.
Tel-Aviv meriniń orynbasary Gal Sharabi 1999 jyly Tel-Aviv pen Almaty arasynda baýyrlastyq bailanys ornatylǵanyna toqtalyp, qalyń buqaraǵa on kún boiy esigi ashyq turatyn kiiz úi ekspozitsiiasy Tel-Aviv turǵyndary men qonaqtaryna qazaq halqynyń dástúri men mádenietin tanyp-bilýge múmkindik beretinin aitty.
Sonymen qatar, shara aiasynda qazaqtyń Uly aqyny Abaidyń 175 jyldyǵyna orai shyǵarylǵan evrei tilindegi «Qara sózderi» kitabynyń tusaýkeseri ótti. S.Burshaqov kitaptyń aýdarmashysy Polina Brýkman men «Beit Nelli Media» baspa úiiniń direktory Alla Serebrinskaiaǵa Qazaqstan Mádeniet jáne sport ministriniń alǵys hattaryn tabystady.
Mereke barysynda Qazaqstannan shyqqan evrei qaýymdastyǵynyń ókilderi ystyq yqylaspen jáne zor rizashylyqpen elimiz týraly jyly estelikterimen bólisti.
Shaǵyn kontserttik baǵdarlama qoiylyp, onda Bar Ilan ýniversitetiniń stýdenti Ámirlan Najmitdinov men Bekjan Qońyrbaev tanymal qazaq kompozitorlarynyń shyǵarmalaryn dombyrada oryndap berdi. Abaidyń «Kózimniń qarasy» ánin qazaq tilinde shyrqaǵan Izrail azamaty Irena Arziýtova erekshe qurmetke bólendi.
Kiiz úi Almaty oblysynda tigilip, «Kaztsink» korporatsiiasynyń demeýshiligimen Izrailge jetkizildi.
Kiiz úi 2 - 10 shilde aralyǵynda Tel-Aviv portynyń saiabaǵynda barsha jurtshylyqqa ashyq bolady.
