Ábý Nasyr ál-Farabidiń eskertkish taqtaishasy Haifa qalasyndaǵy onyń esimimen atalǵan kóshede ornatyldy. Is-shara Izraildegi QR Elshiliginiń qoldaýymen uiymdastyryldy.
Saltanatty rásimge Izraildegi QR Elshisi Satybaldy Burshaqov, Qazaqstannyń Izraildegi qurmetti konsýly Devid Liýksembýrg, Haifa qalasy ákiminiń orynbasary Lazar Kaplan, Izraildiń diplomatiialyq korpýsy men ǵylymi toptarynyń ókilderi qatysty.
Aita ketý kerek, onlain rejimdegi is-sharaǵa álemniń túrli elderiniń akademiialyq qoǵamdastyq ókilderi, sonyń ishinde qazaqstandyq jetekshi joǵary oqý orny – ál-Farabi atyndaǵy QazUÝ rektory, akademik Ǵalym Mutanov qatysty.
Saltanatty rásimde Qazaqstannyń Izraildegi Tótenshe jáne Ókiletti Elshisi Satybaldy Burshaqov sóz sóilep, Qazaqstannyń Ál-Farabi murasyn saqtaý men ilgeriletýdegi mańyzdy rólin atap ótti. Buǵan halyqaralyq ǵylymi yntymaqtastyqty damyta otyryp, akademiialyq qoǵamdastyq úlken úles qosýda.
«Bizdiń kórnekti jerlesimiz adamdardy baqytqa jetý jolynda bir-birine kómektesýge, ári qaiyrymdylyqqa shaqyrdy. Izraildiń iri qalalarynyń birindegi Ál-Farabi atyndaǵy kóshe onyń uly shyǵarmashylyq murasynyń moiyndalýynyń jáne bizdiń elderimiz arasyndaǵy dostyq qatynastardyń joǵary deńgeiiniń dáleli», – dedi Qazaqstan Elshisi.
Óz sózinde QazUÝ rektory akademik Ǵalym Mutanov is-sharany uiymdastyrýshylarǵa jyly lebizin bildirip, ál-Farabidiń 1150-jyldyǵy IýNESKO qoldaýymen álemdik deńgeide atalyp jatqandyǵyn tilge tiek etti.
«Álemdegi eń ádemi tarihi qalalardyń biri, Izraildiń basty teńiz qaqpasy Haifa qalasynda ál-Farabi kóshesi bar ekendigin maqtap tutamyz. Órkeniettiń uly oishylynyń esimin Izrailde máńgi qaldyrý ál-Farabidiń tek bir halyqtyń ǵana emes, búkil adamzattyń mádeni jáne rýhani igiligi ekendiginiń aiqyn dáleli jáne moiyndalýy boldy. Sondai-aq, ál-Farabidiń eńbekterin aýdaryp, olardyń Eýropada taralýyna yqpal etken evrei oishyldarynyń zor eńbegin atap ótkim keledi» – dedi QazUÝ rektory.
Eýropalyq oishyldardyń ál-Farabi traktattary arqyly ejelgi antikalyq ideialarǵa oralýy Eýropada Renessans – Qaita órleý dáýiriniń paida bolýyna áser etti.
Sondyqtan ál-Farabidiń shyǵarmashylyq murasy mádenietterdiń jaqyndasýy men ózara túsinistiginiń simvolyn bildiretin Shyǵys pen Batys arasyn bailanystyrýshy rýhani kópirge ainaldy.
