Izraildiń Sefardtyq Bas ravvini Itshak Iosef Astanada ótip jatqan Álemdik jáne dástúrli dinder kóshbasshylarynyń VI sezinde dini qaqtyǵystardyń neden paida bolatyny týraly aitty, dep habarlaidy QazAqparat tilshisi.
«Men bul jerge eń qasietti qala Ierýsalimnen kelip turmyn. Bizdiń din neni oqytady? Iýdei dininiń negizderiniń biri - shalom, iaǵni beibitshilik. Beibitshilik adamzat ómiriniń bir negizi, beibitshilik - Qudaidyń esimderiniń biri», - deidi ol.
Itshak Iosef nekeni buzý protsesine jii qatysatynyn aitady.
«Ártúrli jaǵdailar bolyp jatady. Zańnamamyzǵa sáikes, barlyq taraptardy tyńdai bilýimiz kerek. Onyń ornyna biz taraptardy tatýlastyrýǵa májbúrleimiz. Solaisha, otbasynyń buzylýyna jol bermeýge tyrysamyz. Tájiribeme súiene otyryp sóiler bolsam, urystyń bári - taraptardyń birin-biri tyńdaǵysy kelmeýi sebebinen týyndaidy. Al taraptar bir-biriniń sózin tyńdaýǵa bar-joǵy bir sát bólse ǵana bári ózgerip shyǵa keledi», - deidi ol.
Izraildik dindardyń aitýyna qaraǵanda, dál osy sebepten iýdaizm eń aldymen, estý organyna barynsha mán beredi.
«Iýdei zańy boiynsha árbir dene jaraqatynyń ózindik quny bar. Iaǵni, bet nemese ózge de múshe jaralansa, onyń belgili bir baǵasy belgilengen. Biraq, bizde qulaqqa túsirgen jaraqat úshin kináli adam eń joǵarǵy qundy tóleidi. Onyń quny - kisini óltirgenmen birdei. Iaǵni, adam estimeitindei jaǵdaida qalsa - onda ol óli adammen birdei bolyp qalady», - deidi I.Iosef.
Ravvinniń aitýynsha, Qazaqstan Prezidentiniń osydan 15 jyl buryn bastaǵan seziniń mańyzy asa zor.
«Qaqtyǵys barysynda ártúrli adamnyń oi-pikirleri de ártúrli. Mine, sondyqtan, Nursultan Nazarbaev bárimizdi bir ústeldiń basyna jinap, biregei múmkindik berip otyr. Endigi jaýapkershilik bizde. Konstrýktivti dialogty jasai otyryp, ózgege úlgi bola bilýimiz kerek», - dep túidi ravvin.
