Izrail ministrler kabineti Gaza sektorynda atysty toqtatýdy maquldady. Bul týraly Izrail premer-ministri Biniamin Netaniahýdyń baspasóz hatshysy málim etti, dep jazdy izraildik BAQ.
Kóp uzamai HAMAS dini qozǵalysy da urys qimyldaryn toqtatýǵa daiyn ekenin bildirdi. Qozǵalys ókili Izrail-Palestina arasyndaǵy áskeri áreketter bastalǵannan 11 kúnnen keiin bitimge kelgenin aitty.
"Atysty toqtatýǵa ózara kelistik, ol eki jaqta da 21 mamyrda jergilikti ýaqyt boiynsha túngi saǵat 2-de (Nur-Sultan ýaqytymen 5:00-de) kúshine enedi", - dedi HAMAS basshysy Ismail Haniianyń Gazadaǵy ókili.
Beisenbi kúni izrail jáne arab basylymdary da Tel-Avivtiń aradaǵy tatýlastyrýshy el – Egipetke atysty toqtatý nieti jaily habarlaǵanyn jazdy. Jýrnalisterdiń málimetinshe, palestinalyq HAMAS radikaldy qozǵalysy 21 mamyrdan bastap atysty toqtatýǵa daiyn ekenin jetkizgen.
HAMAS-taǵy qupiia derekkózi livandyq basylymdarǵa AQSh prezidenti Djo Baiden men Izrail premer-ministri Biniamin Netaniahý arasyndaǵy telefon áńgimeden keiin bitim jaily aqparat shyǵa bastaǵanyn aitqan. Baiden Netaniahýǵa qysym jasady degen joramal da bar.
Keibir aqparat quraldaryndaǵy málimet boiynsha, bitistirýshiler palestinalyqtardan atysty birinshi toqtatýyn suraǵan, alaida HAMAS usynystan bas tartyp, taraptar shabýyldy bir mezgilde doǵarýy tiis degen.
Taraptar arasynda bitim uzaq ýaqytqa sozylýy úshin Egipet Izrail jáne Palestina ókilderi arasynda kezdesý uiymdastyrýǵa kúsh salady degen de aqparat bar.
Degenmen kelisim jaily aqparattarǵa qaramastan beisenbi kúni keshke Gaza sektorynan Izrail jaqqa qarai zymyrandar jiberilgen.
Ótken aptanyń dúisenbisinen beri Izrail men palestinalyq toptar bir-birine kezek-kezek aiaýsyz soqqy jasap jatyr. Izrail jaǵyna qarai 4 myńnan astam zymyran ushyrylǵan. Keibiri ǵana nysanaǵa jetken. Birqatar qalalar búlingen, sońǵy málimet boiynsha Izraildiń 12 turǵyny qaza bolǵan. Óz kezeginde Izrail áskeri de Gazadaǵy HAMAS radikaldy tobynyń nysandaryna soqqy jasap jatyr. Alaida qaza bolǵandar arasynda beibit turǵyndar az emes. Gazada barlyǵy 220-dan astam adam opat bolǵan.
Sarapshylardyń aitýynsha, bul - 2014 jyldan bergi osy aimaqta bolǵan iri qaqtyǵys. Oǵan Shyǵys Ierýsalimnen birneshe palestinalyqty kóshirý týraly sot sheshimi túrtki bolǵan.
