Izrail áýe kúshteri 14 mamyr túnde qurlyq áskermen birigip, HAMAS tobyna qarsy 2014 jyldan bergi eń iri operatsiia júrgizdi. Bul týraly Izrail áskerileri habarlady.
Operatsiia kezinde 160 áskeri ushaq 40 minýt boiy 150 obektini atqylaǵan. Áýe shabýyly kezinde HAMAS tobyna tiesili tonnelder qiratylǵany habarlandy.
Qurlyq áskerileri Gaza sektorynyń aýmaǵyna enbegen. Izrail qurlyq áskeri de operatsiiaǵa daiyndalyp jatqanyn málimdedi.
HAMAS Izrail áskerileriniń áýe operatsiiasyna raketamen jaýap berdi.
Izrail men palestinalyqtar arasyndaǵy qaqtyǵys 10 mamyrda ýshyǵyp, sodan beri jalǵasyp jatyr. Dúisenbiden beri Gaza sektorynan Izrail tarapyna kemi 1500 raketa atqylanǵan. Izrail de Gaza sektoryna dúisenbiden beri birneshe ret áýe shabýylyn uiymdastyrdy.
Gaza sektorynyń densaýlyq saqtaý ministrligi 10 mamyrdan beri 109 palestinalyq qaza bolǵanyn, 600-den asa adam jaralanǵanyn habarlady. Mert bolǵandardyń arasynda 28 bala bar.
Al Izrail segiz adamnyń qaza tapqanyn málimdedi. Marqumdardyń biri – 6 jasar ul bala.
Halyqaralyq qaýymdastyq Izrail qarapaiym adamdar turatyn aýdandardy atqylady dep aiyptaidy. Al olar "HAMAS óz obektilerin adamdar turatyn kvartaldarǵa ornalastyryp, qarapaiym jurtqa qaýip tóndirdi" deidi.
Izraildegi evreiler men arabtar turatyn qalalardyń kóshelerinde de janjal boldy.
BUU men halyqaralyq qaýymdastyq qaqtyǵysty toqtatýǵa shaqyryp jatyr. AQSh bul qaqtyǵysta Izraildi qoldap otyr.
- Aimaqtaǵy jaǵdai mamyrdyń basynda ýshyqty. Izrail Shyǵys Ierýsalimde birneshe arab otbasyn sotpen basqa jaqqa kóshirýdi oilastyryp, sot bastaǵan. Bul palestinalyqtardyń ashýyna tigen. 7 mamyrda juma namazynan shyqqan jurt politsiialarǵa tas, bótelke, armatýra laqtyra bastady.
- Keiin politsiia bul janjaldy toqtatamyz dep Hram taýyna kireberisti jaýyp, musylmandarǵa shekteý qoidy. Palestinalyq basylymdar izraildikter musylmandardy taratý úshin rezeńke oq pen qulaq tundyratyn granata qoldanǵanyn habarlady. Artynsha politsiia Ál-Aqsa meshitiniń aýlasyna basyp kirip, jurtty kúshtep shyǵara bastaǵan.
- Palestinalyqtardy basqa jaqqa kóshirý isi boiynsha sot sheshimi keiinge qalǵanymen, qaqtyǵys toqtamady.
- HAMAS toby Gaza sektoryn baqylap otyr. Bul uiymdy birneshe el terrorlyq top dep tanyǵan. Terrorlyq uiym dep moiyndamaityn elder de bar.
