يزرايل ەۋە كٷشتەرٸ 14 مامىر تٷندە قۇرلىق ەسكەرمەن بٸرٸگٸپ, حاماس توبىنا قارسى 2014 جىلدان بەرگٸ ەڭ ٸرٸ وپەراتسييا جٷرگٸزدٸ. بۇل تۋرالى يزرايل ەسكەريلەرٸ حابارلادى.
وپەراتسييا كەزٸندە 160 ەسكەري ۇشاق 40 مينۋت بويى 150 وبەكتٸنٸ اتقىلاعان. ەۋە شابۋىلى كەزٸندە حاماس توبىنا تيەسٸلٸ توننەلدەر قيراتىلعانى حابارلاندى.
قۇرلىق ەسكەريلەرٸ گازا سەكتورىنىڭ اۋماعىنا ەنبەگەن. يزرايل قۇرلىق ەسكەرٸ دە وپەراتسيياعا دايىندالىپ جاتقانىن مەلٸمدەدٸ.
حاماس يزرايل ەسكەريلەرٸنٸڭ ەۋە وپەراتسيياسىنا راكەتامەن جاۋاپ بەردٸ.
يزرايل مەن پالەستينالىقتار اراسىنداعى قاقتىعىس 10 مامىردا ۋشىعىپ, سودان بەرٸ جالعاسىپ جاتىر. دٷيسەنبٸدەن بەرٸ گازا سەكتورىنان يزرايل تاراپىنا كەمٸ 1500 راكەتا اتقىلانعان. يزرايل دە گازا سەكتورىنا دٷيسەنبٸدەن بەرٸ بٸرنەشە رەت ەۋە شابۋىلىن ۇيىمداستىردى.
گازا سەكتورىنىڭ دەنساۋلىق ساقتاۋ مينيسترلٸگٸ 10 مامىردان بەرٸ 109 پالەستينالىق قازا بولعانىن, 600-دەن اسا ادام جارالانعانىن حابارلادى. مەرت بولعانداردىڭ اراسىندا 28 بالا بار.
ال يزرايل سەگٸز ادامنىڭ قازا تاپقانىن مەلٸمدەدٸ. مارقۇمداردىڭ بٸرٸ – 6 جاسار ۇل بالا.
حالىقارالىق قاۋىمداستىق يزرايل قاراپايىم ادامدار تۇراتىن اۋدانداردى اتقىلادى دەپ ايىپتايدى. ال ولار "حاماس ٶز وبەكتٸلەرٸن ادامدار تۇراتىن كۆارتالدارعا ورنالاستىرىپ, قاراپايىم جۇرتقا قاۋٸپ تٶندٸردٸ" دەيدٸ.
يزرايلدەگٸ ەۆرەيلەر مەن ارابتار تۇراتىن قالالاردىڭ كٶشەلەرٸندە دە جانجال بولدى.
بۇۇ مەن حالىقارالىق قاۋىمداستىق قاقتىعىستى توقتاتۋعا شاقىرىپ جاتىر. اقش بۇل قاقتىعىستا يزرايلدٸ قولداپ وتىر.
- ايماقتاعى جاعداي مامىردىڭ باسىندا ۋشىقتى. يزرايل شىعىس يەرۋساليمدە بٸرنەشە اراب وتباسىن سوتپەن باسقا جاققا كٶشٸرۋدٸ ويلاستىرىپ, سوت باستاعان. بۇل پالەستينالىقتاردىڭ اشۋىنا تيگەن. 7 مامىردا جۇما نامازىنان شىققان جۇرت پوليتسييالارعا تاس, بٶتەلكە, ارماتۋرا لاقتىرا باستادى.
- كەيٸن پوليتسييا بۇل جانجالدى توقتاتامىز دەپ حرام تاۋىنا كٸرەبەرٸستٸ جاۋىپ, مۇسىلماندارعا شەكتەۋ قويدى. پالەستينالىق باسىلىمدار يزرايلدٸكتەر مۇسىلمانداردى تاراتۋ ٷشٸن رەزەڭكە وق پەن قۇلاق تۇندىراتىن گراناتا قولدانعانىن حابارلادى. ارتىنشا پوليتسييا ەل-اقسا مەشٸتٸنٸڭ اۋلاسىنا باسىپ كٸرٸپ, جۇرتتى كٷشتەپ شىعارا باستاعان.
- پالەستينالىقتاردى باسقا جاققا كٶشٸرۋ ٸسٸ بويىنشا سوت شەشٸمٸ كەيٸنگە قالعانىمەن, قاقتىعىس توقتامادى.
- حاماس توبى گازا سەكتورىن باقىلاپ وتىر. بۇل ۇيىمدى بٸرنەشە ەل تەررورلىق توپ دەپ تانىعان. تەررورلىق ۇيىم دەپ مويىندامايتىن ەلدەر دە بار.
