16 maýsymda tań atpai turyp Izrail áýe kúshteri Gaza sektoryndaǵy HAMAS nysandaryn atqylady. Izrail áskeriniń habarlaýynsha, Palestina aýmaǵynan Izraildiń ońtústigine qarai "janǵysh zattar toltyrylǵan sharlar" ushyrylǵan, soǵan "jaýap" retinde áýeden shabýyl jasalǵan.
Bul ótken aida eki tarap arasynda atysty toqtatý týraly kelisim kúshine engennen keiingi alǵashqy shabýyl. Izrail áskeriniń habarlaýynsha, Palestinadan ushyrylǵan "janatyn sharlar" eldiń ońtústiginde birqatar alqaptyń órtenýine túrtki bolǵan. Izrail áskeri taratqan habarlamada HAMAS tobynyń áskeri keshenderdi shabýyldy uiymdastyrý úshin paidalanatyny jazylǵan. "Oqiǵa qalai órbimesin, Izrail kez kelgen jaǵdaiǵa saqadai sai daiyn otyr" delingen málimdemede.
15 maýsymda Izrail týyn ustaǵan júzdegen ultshyl Shyǵys Ierýsalimde sherýletip júrgen. "Janǵysh sharlar" men áýe shabýyly jaily aqparat sol sharadan keiin paida boldy.
1967 jyly Izrail Gazany, Batys jaǵalaýdy jáne Shyǵys Ierýsalimdi basyp alǵan. Osy oqiǵany jyl saiyn atap ótetinder ádette Musylmandar dańǵylymen júretin. Biraq biyl Izrail biligi sherýshilerdiń júretin jolyn ózgertti.
Palestinalyqtar sherýdi "arandatý" dep baǵalap, FATH pen HAMAS Gaza sektory men Batys jaǵalaýda "ashý-yza kúnin" ótkizýge úndegen.
