Foto: Amichai Stein / X.
Izraildiń Tel-Aviv qalasy mańyndaǵy Bat-Iam aýdanynda úsh avtobýs jaryldy, bul oqiǵany bilik terakt bolýy múmkin dep tekserýde. VVS-diń habarlaýynsha, aldyn ala málimetterge sáikes, zardap shekkender joq.
Qosymsha eki avtobýstan jarylǵysh zattar tabylǵan. Izraildiń aqparat quraldary kólik ministri Miri Regevtiń barlyq avtobýstar men temirjol qozǵalysyn toqtatyp, jarylǵysh zattardy tekserýge buiryq bergenin jazdy.
Politsiia ókili Ari Doron 12-arnaǵa bergen suhbatynda quqyq qorǵaý organdarynyń aimaqty tekserýdi jalǵastyryp jatqanyn jáne turǵyndardy kúdikti zattarǵa muqiiat bolýǵa shaqyrǵanyn málimdedi. Ol jarylystarǵa qatysty:
"Abyroi bolǵanda, lańkester taimerdi durys ornatpaǵan bolýy múmkin, biraq bul jaǵdaiǵa naqty baǵa berý áli erte", — dep atap ótti.
Áleýmettik jelide jariialanǵan beinelerde bir avtobýstyń órtenip jatqany jáne odan tútin shyqqany baiqalady. Jergilikti aqparat quraldarynyń habarlaýynsha, jarylmaǵan 5 keli jarylǵysh zattyń birinde «Týlkarm úshin kek» degen jazý bolǵan. Bul jazý Izrail áskeriniń jýyrda Batys Sheriiada júrgizgen lańkestikke qarsy operatsiiasyna qatysty bolýy múmkin.
Izraildiń qorǵanys ministri Israel Kats Batys jaǵalaýdaǵy bosqyndar lagerlerinde operatsiialardy kúsheitý týraly tapsyrma bergenin habarlady. Al premer-ministr Biniamin Netaniahý oqiǵa týraly tolyq aqparat alǵan.
Bilik turǵyndardy Bat-Iam aýdanyna barmaýǵa jáne kúdikti zattar tabylǵan jaǵdaida qyraǵy bolýǵa shaqyrýda. Buǵan deiin Izrail premer-ministri BAPOR qyzmetine tyiym salý týraly zańdy oryndaýǵa tapsyrma bergen bolatyn.
