Shyǵys Qazaqstan oblysynyń turǵyny oqýshy qyzǵa qaraqshylyq shabýyl jasaǵany úshin bes jylǵa bas bostandyǵynan aiyryldy.
Oqiǵa mamyr aiynyń sońynda bolǵan, biraq shabýyldyń mán-jaiy sot otyrysynda belgili boldy, dep jazady Sputnik Qazaqstan agenttigi YK-News portalyna silteme jasap.
Sot materialdaryna súiensek, sol kúni qyz qurbysymen birge kún batqanǵa deiin kóshede júrgen. Qarańǵy túskende, úilerine taraǵan. Oqýshynyń qulaǵynda symsyz qulaqqap bolǵan, sol sebepti artynda bireý kele jatqanyn estimegen. Telefondaǵy kezekti áýen aiaqtalýǵa taqaǵanda ǵana eleń etken. Dál sol sátte er adam oǵan tap berip, qolyndaǵy izolentamen býyndyrmaq bolǵan. Biraq oqýshy qyz qolyn lentanyń astynan ótkizip úlgerip, kúshpen julqyp qalǵan. Izolenta úzilip, bir bóligi onyń shashyna jabysty, al ekinshi bóligi qylmyskerdiń qolynda qaldy.
Er adam qyzdy gazonǵa qulatyp, basynan ura bastaǵan. Qyz qarsylasyp, kómekke shaqyrǵan. Sol mańnan ótip bara jatqan jastar aiǵaidy estip, kómekke umtylǵanda qylmysker qorqyp, izin jasyrypty.
Biraz ýaqyt ótken soń quqyq qorǵaýshylar qaskóidi ózi turatyn Beloýsovka aýylynan (Óskemen mańy) tapty. Ustalǵan adam buǵan deiin de isti bolǵan. Qyz ózine shabýyl jasaǵan er adamdy tanydy.
Sot qaraqshylyq shabýyl jasaǵany úshin qylmyskerdi bes jylǵa bas bostandyǵynan aiyrdy. Sondai-aq ol jábirlenýshige moraldyq jáne materialdyq shyǵyn retinde jarty million ótemaqy tóleýi kerek.
