Alaiaqtyq jasaǵany úshin eki jyl boiy izdeýde júrgen aqtóbelik Reseide qolǵa tústi, dep habarlaidy «Ult aqparat».
Aqtóbe oblystyq politsiia departamenti 2018 jyldan beri izdeýde júrgen kúdiktini ustady. Qazirgi kezde ony Reseiden Qazaqstanǵa ekstraditsiialaý máselesi qarastyrylyp jatyr.
«Sondai-aq, alaiaqtyq jasap sottalǵan taǵy bir aqtóbelik Almaty qalasyna qashyp ketken. Sot úkimi onlain shyqqan soń ol jasyrynyp qalǵan. Aqtóbe oblysynyń politseileri jyl basynan beri izdeýde júrgen on qylmyskerdi ustady. Olardyń tórteýine ótken jyldary izdeý jariialanǵan. Kriminaldyq politsiia sot tóreligi organdarynan jasyrynǵan jáne habar-osharsyz ketken adamdardy izdestirý boiynsha jumysty turaqty negizde júrgizedi jáne odan ári jalǵastyrady», - dedi oblystyq PD baspasóz qyzmetiniń jetekshisi.
